Oin-oiala
Iturrixar
Nere etorburua
ardiaren larrua.
Abere apal onek
eman oi bai zuan
bere ille ederra
Urte'ren barrean.
Etorri zan gizona
Guraize batekin;
ebaki ninduen ta
eraman berakin.
Tramankulu batean
sartu nai ninduen...
Zalaparta aietan
ikaraz nenguen.
Nere jabearen
arlo apaltxoa
ta txorien abesti
xamur ta goxoa
izan ziran araiño
nere erestaldi:
ordurarte burrunbak
ez nituen adi.
Zorro baten barruan,
oso baztertuta,
utzi ninduten antxe
beldurrak artuta.
Ogetalau ordu
lur bazterrean
-nork daki zertarako!-
nion negarrean.
Gaua onela igaro
ta urrengo egunean
artu ta uretara
bota nindunean...
"Emen dek azkena",
nik esan nuan;
baiña... bai zera!
Nengoala ia itoan
atera ta zelaira
eraman ninduan.
Uraxe bai poza
neukana barruan!
Aize ta eguzkia
ni maiteaz ziran...
Nere larri amaia
orra nun eldu zan.
Baiña... ez, jauna, ez.
Ez dira bukatu
nere ezbearrak;
oraindik neregan
dauka lana arrak.
Sartu naute berriro
tresna baten barruan,
antxe, tira ta bira
ia-ia ituan.
Margozko uraz orain
ito nai naute:
gizonok burubide
onik ez daukate.
Len zuriz nintzana
naiz orain orlegiz,
ez deiola burutu
aldatzerik berriz.
Ez detanez beiñere
izan politikarik,
ez nuan ba bear
margoz aldatzerik.
Gaitzerdi berriro ere
zelaira bai noa,
legortu deien arin
oraingo margoa.
Eguzkiaren argiz
ikus nintzanean,
nerekikoz begira
margo dotorean,
arrotu nintzan oso
ta nion nere artean:
"Ez neukan tankera au
ardi bizkarrean;
ikusko ba'nindute
ardien jabeak,
espa piztu leioke
nere dotoreak".
Orra oldozpen ontan
nengoala pozez,
beste tramankuluan
sartu naute artez.
Etzegon urik emen,
ez ito larririk,
baiña okerrago zan
iltzea josirik.
Onela narabilte
eten gabe zirt-zart,
igika gora-beera
arin jostorratz bat.
Orain da amaia
nere biziarena,
onenbeste zaztadaz
galdu det almena.
Jostea naiko ezta,
artu du artazia.
Nerekikoz diot:
«Galdu det bizia».
Ebaki ta ebaki
dana berdindu arte,
motx-motx egin eta
guzia utzi naute.
Orain arkitzen naiz
zirrian josia
eta margo politez
jantzita guzia.
Arrotu naiz berriro;
apain-apaiña nago,
oso lagun ta txukua,
igaroak igaro.
Begirakada danak
neretzat dira orain:
egi-egiz nagola
dotore ta apain.
Arro baiño arroago
naiz orain txintxilik,
saloki eder baten
guztiz agerturik.
Danak begiratzeko
naiz bada egiña:
agurka lez aurrean
daukat erregiña.
Arro ametsetatik
oin-azpin esnatuz,
aretoko lurrean
nabilte zapalduz.
Noizik-bein datorkit
neska asarratua,
makil batez jorratuz
uztera ebaindua.
Nai aiña zapaldu ta
jorra nautenean,
zarra nagola eta
sar gela illunean.
Ainbeste sits dauzkat
nere bizkarrean,
nork baiño nork geiago
zulatu ta jan naiean.
Orain bai nere bizia
dagola amaiean,
obekigo nengoan bai
ardiaren soñean.
Arrokeriz aundituz
igotzen geranean,
maiz gerta oi zaigu
arkitzea utsunean.
|