Nere maiteari
Ibai-ertz
1
Maite mindurik daukat
nik nere barrena
betirako galduta
maiterik maitena.
Ezin gozaturikan
nigan detan pena
trixtea ikusten det
nere ondorena.
Bertsoz jarri nai nuke
gertatu zaitena.
2
Ogei urte nitula
ni enamoratu
eta Ana'k bererik
etzidan ukatu.
Bi urte barru bera
gaitzak menderatu
minbizi zital batek
zidan lurperatu,
orra poza naigabez
nola zan trukatu.
3
Gaitz onek sortzen ditu
eundoko negarrak
sendietatik kenduz
gazte eta zarrak.
Aurka saiatu arren
mediku azkarrak
beti gaitza garaille
ai, oiek indarrak...
Inpernutarrak dira
orren atzaparrak!!
4
Zenbat oroitzen naizen,
biotzeko Ana,
nere pentsamentua
beti zuregana.
Bakardade onetxek
ematen dit lana,
aspaldi galdu nuen
ilusio dana,
zuk izan bear zendun
nere aurren ama!!
5
Eguzkiaren gixa,
zu dizdiratsua
eta zuri-gorria
zenduan musua.
Aingeruen antzeko
zuk gorputz osua
izketa leguna ta
biotza goxua...
Oiek piztu zidaten
maitetasun-sua.
6
Asmo bat genduen guk
kabi bat sortzeko,
bertan alkar maitatuz
alai bizitzeko.
Suerterik ez da izan
gauza au lortzeko,
nunbait jaio giñaden
penak pasatzeko...
Au ez al-da naikoa
poz denak galtzeko?
7
Zu il ziñanetikan
au daukat buruan:
«Izar bat ba-dagola
geiago zeruan».
Ni berriz emen nabil
illunpen munduan,
poza arkitutzeko,
Ana, nora juan...?
Ai, biok bagiñake
Jaunaren onduan!!
8
Illobira joaten naiz
astero-astero,
ta otoitzetan oroi
zuaz egunero.
Maitasuna zugana
daukat bero-bero.
Goian alkartutzea
det orain espero,
zer zoriona, maite,
au lortu ezkero!!
9
Mundua pasako det
bakar ta trixterik,
zu gabe gauza denak
neretzat uskerik.
Zurekin ez daukat nik
sekula azterik,
berriro amoretan
ez det nai asterik:
nik ez det maitatuko
iñoiz zu besterik!!
10
Ara bertsotan esan
neri gertatua;
egia aitortzea
ez da pekatua.
Ana, egongo zera
Zeruan sartua,
Jaunak Bere Argitan
betiko artua...
Neretzat ere gorde
ezazu lekua!!
|