Dibertitzeko gaztetan
Ibai-ertz
-1-
Dibertitzeko gaztetan
egon gaberik penetan
izan naiz San Fermiñetan.
Pesta ederrak ikusi ditut
Iruñako kaleetan,
jende guztia brometan
uri artako jaietan
oberik ez lur onetan!!
-2-
Etxetik irten bezperan
gauza guztiak aukeran
ezer ez gendun galeran.
Begiz ikusi nai genduen guk
pesta ori zer ote dan,
naiko dirua karteran
indianoaren eran
ala nola saia geran
-3-
Lo gaberik gaua pasa
korrituz kale ta plaza
nun naitik jendezko masa!
Alaz guztiaz lanean ainbat
etzan estutzen arnasa,
ango broma ta jolasa
ibiliak gera lasa
ta goizean ura traza!
-4-
Egun sentian zezenak
etziran oso zuzenak
kalez kale zetozenak!
Aiek estutzen zituzten,gogoz
zenbait txoruen barrenak,
larri-aldirik txarrenak
alde egiten etzutenak
alperrik geroko penak!
-5-
An iñortxo etzan zakar
danok konbidatu alkar
broma gauz onetxek dakar!
Estafetatik zezen beltx gorrik
etorri ziran su ta gar...
Laixterka gazte eta zar
batzuk bizkor, bestek baldar,
eta jotzen zunari par!!
-6-
Lepotik zapi gorriak
ta beratzuri berriak
parpall bezela jarriak.
Eta gañera ase ditugu
urte biko egarriak,
ondo pasatuz neurriak
ta gaztatuz egarriak
ibillera galgarriak!!
-7-
Txurro ta pattar nasketa
danok goraño beteta
jaunak, etzan berriketa!
Izar Berriko Patxiko Marik
antxen artu zun kasketa,
indarra gañezka dueta
jo ta gaiñ azpira buelta
txurrero baten kaseta!!
-8-
Etorri zan aguazilla
pekatariaren billa
Jesusi ango iskanbilla!
Txistua joaz asi orduko
an dator bere kuadrilla...
Orduan Patxi umilla,
nundek lengo ukabilla?
Ta itzalera mutilla!!
-9-
Patxi kartzela aldera
gu berarekin batera
lagunari laguntzera.
Gure mutillak eskeintzen dio
aguazillari kartera...
Onek ez egin atzera,
ba-zun Judasen tankera
ta oraingoz libre gera!!
-10-
Bukatu zaigu demanda
egia garbi esanda
sinistea ere lan da.
Era ortako «Konpra» guk egin
San Fermiñetara juan da,
tratante xamarra zan da
gu ere ala izan da
libre dirua emanda!!
-11-
Ostatu batean sartu
bazkari ona eskatu
ezin nezake ukatu.
Ekarritako jan erdirikan
guk ez genduen probatu,
kontua ondo pagatu
mai gañean loak artu
ta zortziretan oartu!!
-12-
Biotzeko lagun fiñak
egin ditut alegiñak
kontatzen aurten egiñak.
Iruña ortan pasa ditugu
ordu alai, atsegiñak...
Ez gaitzala galdu miñak
betoz bai egun berdiñak
gozatzeko SAN FERMIÑAK!!