Gazteek suerte, zaharrak fuerte

(Leintzko bertsolari)(?)

 Gazteak ba omen du

 hamaika birtute

 Leintz bailaran ere

 hala uste dute

 zaharrok, gaba bateko

 txalo denen truke

 hori hola ote den

 jakin gura geunke.

 Gazteak eskoletan

 bertsotan ahalegin

 gero exitoekin

 harro ta atsegin

 horra DESAFIOA

 gura ba da egin

 onenak zeintzu diren

 garbi geldi dadin.

 Leintzen gaituzue

 hamar gizon trebe

 lehengo «berezko» zaharra

 dugu gure lege

 eta ustez ba dugu

 nahikoa podere

 gazteak onak dira?

 baita zaharrak ere!

 Geu gehiago garela

 goaz frogatzera

 ez ba duzue behintzat

 egiten atzera

 hil honetan etorri

 baldintzak jartzera

 San Migelenean gu

 zai egongo gera.

 Jarraipena emanda

 esandako horri

 jarri behar zarete

 estu eta gorri

 arren ken itzazue

 muki eta zorri

 gutxienez apainduta

 neurtzera etorri.

 Izartzelaia, Felix

 Goikolea gaina

 Sarasua anaiak

 ta Ritxar bikaina

 Arantzazu Loidi ere

 hortxe dago baino

 ezetz izan zaharren

 ekipoa aina!

 Sarasua omen da

 mutil mundiala,

 beste onik egongo

 ez balitz bezala

 bertsozale jendeak

 hau-jakin dezala

 eskolakume horiek

 aina bagerala.

 Epaiak izango du

 bere lan jarduna

 gazte ta zaharretatik

 lau edo hiruna

 hau da desafioa

 egiten duguna

 zuen esku uzten da

 toki ta eguna.