Jende jatorra daukagu Aian

Lasarte

 Jende jatorra daukagu Aian

 lehen ere halaxe esan da;

 ezagutzen det gazte denboran

 hemen bizitu nintzan da;

 bihotz haundiko herria zera

 zu hitz batean esanda

 zergatik maite nazu hainbeste

 ni ezerez bat izanda.

 Hau egunaren edertasuna,

 hau pozaren txoramena;

 nahiz eta jakin ni ez nintzala

 hainbat merezi nuena;

 bainan badakit Aiak ahal dana

 bihotzez egin duena,

 bedeinka zazu herri polit hau

 Aita zeruan zaudena.

 Lehendabiziko eskertzen ditut

 jai hau eratu dutenak

 eta hurrengo lan guztietan

 parte hartu dezutenak;

 zer esanik ez ni erregaliz

 hola jantzi nazutenak,

 danok zerate esker beroak

 merezi dituzutenak.

 Euskal Herrian lagun maiteak

 baditu alde danetan,

 hau baino gauza haundiagorik

 zer leike mundu honetan;

 agur anaiak agur arrebak

 hitzikan goxoenetan,

 lelai portatzen zeratelako

 maite zaituztet benetan.