Gaztea, norat hoa?
Landart, Daniel
1
Gaztea, norat hoa, gau ilunean
Bakar bakarrik,
Gogoa ilun, bihotza huts,
Amodiorik gabe,
Munduaz asea,
Jendez nardatua,
Plazerrez gohaindua,
Norat hoa?
Noren ondotik habil,
Nor duk xerkatzen?
2
Bahoa, gau ilunean,
Norbeit hatxeman nahiz.
Bahoa, urratsa luzatuz,
Soinu bat urrunean
Aditzen bahu bezala.
3
Bainan badakik
Ez dela soinurik,
Eta balitz ere,
Ez hintakela pestarat joan!
4
Edo bertzenaz, nahi huke
Norbeit hire goait balitz.
Gau ilunean,
Ganbera ttipi batean,
Argia antxu hila,
Izar eder bat...
5
Bakarrik, hire bihotzeko izarra
Bertze batekin dela badakik.
Eta begiak hesten dituk,
Esku ahurra tinkatuz.
6
Hire adixkidez ahantzia,
Biziaz etsitua,
Lanean akitua,
Ez dakik zer egin,
Eta bahaki ere,
Ez huke kalipurik.
7
Zer zauk gertatzen,
Zer egin duk behar etzenik?
Kara hits horren biltzeko,
Bizian kuraiaren galtzeko?
8
Zer egin duk...
Bainan hiaurek ez dakik!
Eta ez duk gelditu nahi
Burua bi eskuen artean harturik,
Bi gogoetaren egiteko
Eta berriz abiatzeko
9
Kopeta gorarik,
Bihotza amodioz beterik...
Bainan ez, begiak hetsirik
Nahiago duk kurritu, eskuin, ezker,
Gelditu gabe... joan, joan, joan!
10
Gaztea, norat hoa ?
|