Hamalau bertso bari, hamabi herrietako oraingo bizimodauren gaiñian
Kosune
-1-
Nik emango ditut orain
notizia txarrak,
gurasoek ditue
egingo negarrak,
gaztediak, akaso,
algara ta farrak,
galdurik diralako
oitura zaharrak.
-2-
Lenen kasuan dagoz
gure laboriak:
nun dira pagadiak
eta arestiak?
Galdu dira artotzak,
galdu, bai, gariak;
ganantzia, itxuraz,
belar-pinudiak.
-3-
Usaia handia zan
hementxe labrantza,
gizonek sartzen eben
horretan biotza.
Baina, lurrak salduta,
hona heriotza:
zeren diru horrentzat
Bilbon dago Boltsa.
-4-
Gaztedia kalera
solorik nahi ez,
labrantzan bete ezin
faltrika diruez,
nobia bilatzea
baserrian nekez,
auzoak bete dira
neska-mutil zarrez
-5-
Komediak dirala
gure fabriketan:
Erdaldun-euskaldunak
leku berdinetan.
Nagusi bat berari
beti zerbitzuetan,
baina gizon diferent
biotz-kanpoetan.
-6-
Erbestetik pioiak
honaxe pillatu,
jornal diferentekin
danok aldrebestu.
Guztiok lotu estu
alkartzea eskatu,
holantxe nagusiak
sendo aberastu.
-7-
Zazpigarren puntuan
elizen krisia,
fedearen galtzia,
apaizen faltia,
monjen ezkondutzía
kristauen kalia:
arras aldatu dala
zaharren fedia.
-8-
Banakak jardun arren
apaizak sermoetan,
botatzen hitz galantak
euren pulpitoetan,
pobreak defendituz
nausien kaltetan,
Mari Atsoak diño:
«Marxistak benetan».
-9-
Lenago legea zan
semeak amabi;
oraingo familiek:
«Larregi dira bi».
Amorea egiteko
zenbat aldiz nahi,
botikan erosten da
pildora anti-baby.
-10-
Hiluntzean etxera
gazteak poliki,
oitura zan bezala
lenago apalki.
Gaur, barrez, sartzen dira
Boite-ra alaiki,
xirritxuak alkarri
eta txurrut wisky.
-11-
Urkiolako puntan
zer deboziñoak?
Estonbak topatu nai
han bokasiñoak.
Txanponak bildutzeko
zer okasiñoak
Rios-en zabaltzeko
kristau misiñoak.
-12-
Euskaldunon hizkuntza
asko jaku erori,
erdarak terrenua
kendu euskarari,
alperrik eskatzea
laguntza Estaduari,
ai zer enkargu latza
utz ikastolari.
-13-
Gorostizak pelotan,
Antzuak probetan,
Antonek kanpoetan,
Berrizek txuletan,
fama handia dabe
Amabi Herrietan,
oraingoan ez gara
sar politiketan.
-14-
Durango, ingurua
izango da geixa,
sorturik egunero
bizitza barrixa.
Ez da naiko, alare,
urteko perixa.
Aurrerantza beti, zuk,
egizu Gereixa!
|