Udazkena
Kalonje, Segundo
-1-
Urri-illaren erdi aldean,
argia eta leguna,
pozik etxean artu diteke
olako bizi-laguna.
Estimatzea obeko degu
leial ematen zaiguna,
ai, aurten ere zein udarazken
zoragarria deguna!
-2-
Ta, batez ere baserritarrak
boitzez daukagun poza,
zerbait anparo ba-dala beintz,
naiz nai ainbat ezin osa;
mintasun asko urrutiratu
ta al bagindezke goza,
lore betean orain daukagu
udaberriko arrosa.
-3-
Intxaur, piko ta arto-babarrun
ta diran sagar aleak,
premirik iñoiz ez da palta-ta,
guztiok gera zaleak.
Itxaropena edukiarren
izaten dira kaleak,
orduan ere ez gera oso
esker on eman-zaleak.
-4-
Gure labore arlote oiek:
sagar, arto ta babarrun,
lurraren bidez eltzen diranak
sei illabeteren barrun.
Ta egualdiak gaiñetik berriz
zer nola lagundutzen dun,
jan-gaia urri degun urtean
iñoiz esteak alargun.
-5-
Udaberrian esaten zana:
aurten ez daukagu ezer!
garagarrillak erdia jota
parregarri eta oker.
Baiña geroztik opatzen digu
makiñabat egun eder,
bizitarako moduan gera
udarazkenari esker.
-6-
Gertatzen dana ikusita ni
ixilik nola gelditu?
txit aulak ziran landare asko
azkenerako aunditu;
pentsatzen etzan modura gauzak
dotore erremeritu,
nai duenean orrek okerrak
errez zuzendutzen ditu.
-7-
Emaleari esker ematen
gogoz asiko bagiña,
orretarako bear genduke
boitzez maitasun piña.
Argaltasunak galerazten du;
ez gera irixten diña,
gu kapaz gera gaizki artzeko
askotan ondo egiña.
-8-
Alguztidunak ematen digu
guk merezi degun aiña,
orain dijoan bolara onek
ba-dirudi esne-gaiña;
eguna joan da, eguna etorri,
auxe udazken apaiña!
Ipintzen digu nun eguzkitu,
ez gera aseko baiña.
-9-
Txantxangorriak txio-txioka
egun sentian ertzean,
geroxeago kantari berriz,
bat bai zugaitz bakoitzean;
udara-azkena ez dute uzten
oiek aztuta atzean,
kuxkurxeago ibiltzen dira
negu gogorrak jotzean.
-10-
Giro onaren indarrarekin
nabaitzen danean sasoi,
bakoitzak bere jatorriari
ematen dio arrazoi.
Euskalerriko txoritxoetan
nabarmentzen dana bat oi,
udara-azkenak txantxangorria
noizpait jarri zuen patroi.