Bertsoak ipiñi nai
Kalonje, Segundo
-1-
Bertsoak ipiñi nai
dizkiot «Bilintx'i»,
ark merezi bezela
ni ezin iritxi.
Ura bezelakoak
izan dira gutxi,
au aitortu nai azik
ez ezpañak itxi.
-2-
Eun urte gutxienez
noski, ba-dirala,
«Bilintx'en» bertso asko
azaldu zirala.
Nik ere egingo det
nere egiñala,
esanaz «Bilintx» ona
bertsoetan zala.
-3-
Indalezio izena,
gero Bizkarrondo,
bertso politak jartzen
ba-zekien ondo.
Zeruan ez dagonik
ez nuke esango,
an ezpadago ere
ez al da joango?
-4-
Zeruen dagoela
baldin banekike,
arek egin zuena
alegindu nik-e.
Inpernuan ez dala
ziur esan leike,
bakoitzak erregutu
«salve» bat bedeike.
-5-
Zar zarra etzan gorde
mundu onetatik,
berrogeitabost urte,
sei beñepein betik.
Gurutze Santuaren
señaleagatik,
zeruan baldin bada
ez dio inportik.
-6-
Erreztasun bikaña
ba-zuen beregan,
bai egin ere zerbait
zoragarrizko lan.
Zuzmurrak ba-ditugu
zeruan ote dan,
aren antz-antzeko bat
bai omen dabill an.
-7-
Nola egon ninteke
ni orain ixilik,
izparringiak dauzkat
nunaitik zintzilik.
Norbaitek iritzia
galdetuko balit,
nik aren bertsoak jo
eder eta polit.
-8-
Irakurri ta gero
ausnartu banaka,
itz eztitsu, politik,
jarrita ba-dauka.
Pillatik bazterrera
nolanai tiraka,
alakoak ez dira
izan amarnaka.
-9-
Zerizkion guzian
beti bertso jartzen,
barrengo maitasuna
norbaiti agertzen.
Neskatx ederreneri
loreak botatzen,
Euskalerria gutxi
etzuen ondratzen.
-10-
Xamur artzen zizkion
gauz askori gañak,
iñoiz adoratuaz
neskatxen ezpañak;
bertsoetan jartzeko
ain lore apañak,
urrezkoak zituen
ark buruko zañak.
-11-
Arek apaindutako
makiñatxobat itz,
gure oroitza ontan
agoz-ago dabiltz.
Amets bat egin det nik,
ai, egia balitz!
oraindik bizi dala
Donostia'n «Bilintx».
-12-
Ai, bizirik balego
«Bilintx» oraindikan,
ez igasi joan ere
neskatxengandikan.
Niaz urte asko izan
onera andikan,
maitatuko lituzke
biotz barrendikan.
-13-
Atsegin auxe zuen
lenengo itzetik,
etzan galdukerian
ibiltzen atzetik.
Neskatxak maitatzeko
biotz-biotzetik,
Jesus'ek agindua
zuen gurutzetik.
-14-
Neskatxak bezelaxe
maitatu eliza,
ondo sinisten zuen
Jaungoikoan itza.
Zerutikan datozen
milagroen gisa,
arek azaldu zuen
bere jatorritza.
-15-
Donosti'ko seme bat
ain neskatx maitea,
Jaungoikoak nai nunbait
ala izatea.
Samintasunez daukat
biotza betea,
omenaldi bat ari
gaur ez egitea.
-16-
Esker Jaungoikoari,
«Bilintx'i» graziak,
dakizkidan apurrak
ari ikasiak.
Gaude entzunak eta
ondo ikusiak,
etzituela jarri
bertso itxusiak.
-17-
Ontantxe ziur nago,
dagola urruti,
ta ni ara joateko
bainabill beldurti.
Zerbait eskeñi nai-ta
or nenbillen beti,
bertso-jartzalle polit,
«Bilintx» zana bati.
-18-
«Bilintx'en» lan politak
dira ezaugarri,
nik iñoiz gogoz asko
ditut irakurri.
Zor nizkionak ziran
aspaldian ari,
ta orra emezortzi
bertso artzaz larri.
|