Baserriko kontuak
Kalonje, Segundo
-1-
Gauzik onena degu
Jaungoikoa jabe,
negua igaro du
lan giro gabe.
Bere gogoa, noski,
izango da obe
lur-sagar asko asko
egiñak ez gaude;
lan geiago ere
atzean or daude
alperrak dotore
kontzientziz more,
gorputzak itxoiña
baitu mesede.
-2-
Negua joan eta
orain Udaberri,
egunak luzatuaz
zuzen etorri.
Patatik ezin egin
ta gabiltza larri,
nekazariarentzat
baita lotsagarri;
disgustua sarri
nunaitik ezarri
begira gauz orri
kale ta baserri,
guretzat dago zenbait
ixtillu gorri.
-3-
Baserritar gazteak
esanaz dabiltza,
«kalera joan beagu»,
lenengo itza.
Gezurretan eztet nai
iñorekin mintza,
ezpaitet alakoa
kopeteko mintza;
au al da bizitza?
beartsu gabiltza
etorri murritza
sendotutzen gaitza...
asko uzten ari da
nekazaritza.
-4-
Aundia txikiari
gogor arrapazka,
orrekin artzen det nik
askotan nazka.
Lendik egiña dago
guretzako aska,
beti lotuta gaude
ezin gera aska;
buruari azka
makiñabat kezka
zuzen ezin eska
iñoiz aldrebeska,
norabait joan bearra
dago igeska.
-5-
Mendi aldetik dator
asko goitik beera,
bizitza xamurrari
artu nai era.
Mundu ontan ortara
alegintzen gera,
irixten bada beintzat
onena da bera;
daukagun aukera
ez utzi larpera
alperrik galtzera
jarraitu aurrera,
biotzez maitatuaz
beti euskera.
-6-
Danak berdin jotzerik
eztaukagulako,
indarrekoak ere
ba-daude pranko.
Itxaropena ba-det
oiekin geroko,
gezurrezko soiñurik
eztet aterako;
arloteak kako
bizimoduz plako
egia dalako
ezpalute joko,
errukia nun dago
orretarako?
-7-
Indartzen ari dira
txillar eta sasi,
baserriko legeak
erabat nasi.
Emen zer eldu zaigun
ez al da ikusi?
langilleak aituta
alperrak nagusi;
makinak erosi
eztago itxusi
oiek ondo ezi
lan egin-arazi,
asko nekatu gabe
dotore bizi
|