Kristaua entzun

 1.

 Bekatua dalako gaitz guztien gaitza,

 arrentzat izan zazu gorroto bizia;

 artatik beti ere begiratu zaitez,

 bizi zeran artean ortan saia ziñez.

 2.

 Sakramentuetara urbiduz sarritan

 sendo egongo zera zure asmo onetan;

 an emango zaizkitzu doai bereziak

 errezki garaitzeko zure etsai guziak.

 3.

 Maite zazu etxea, bizitze gordea,

 ixiltasuna, lana, zure eginbidea,

 ekin otoitzari ta irakurtzeari,

 irakurria beti gogoan ibilli.

 4.

 Bizitzaren lorea da gaztetasuna;

 adin guzietan den maitagarriena;

 gaizkira makur bedi, iñon ez gelditzen;

 ongira itzul bedi, ­a zein azkarra den!

 5.

 Azkar dire gazteak, gartsu eta bizi

 zarrak ordea gogor, astun, uzkur, nagi;

 ek uda dirudite bere egun luzetan

 ok berriz negu latza izotz, elurtetan.

 6.

 Etsaiarentzal bada izango ole dezu

 zure adin autua, gaztea, esazu?

 biziaren onena eman gaiztoari

 ta ondarra gordetzen diozu Jaunari?

 7.

 Zuk, o Jesus maitea, gure Jabe ona

 jende gazte zintzoak maite dituzuna,

 egiazko zintzoak beti itzazu lagun

 bere asmo onetatik ez daitezen urrun.