Barren-izketak

Jauregi, Luis

 -I-

 Ezjun, ene biotza,

 baratzera

 alako loretxoa

 usaitzera,

 pozoidun intza dauka

 ta ilko zera.

 Mendi-tontor artara

 gaur biotza,

 ez igo, an bai dago

 gaur mirotza:

 ez igo, gaur an dezu

 eriotza.

 Ez jun uxotxoekin,

 garietan,

 eiztaria antxe dezu

 gordeketan:

 ez jun, arren, biotza,

 ze-kaltetan.

 Ez jun, errekatxora

 edatera,

 zure egarri bizia

 asetzera:

 ur-ertzean egarria

 ilko zera.

 -II-

 Zoaz, ene biotza,

 aldarera,

 lore-zuri-gorriok

 usaitzera,

 ezti-tantoz ezpañak

 bustitzera.

 Zoaz, Tabor-mendira

 eguzkia

 ikustera elurrez

 gaur jantzia:

 zoaz, antxe dezu gaur

 zuk bizia.

 Jun, uso zuriekin

 ogieta:

 eiztaria antxe dezu

 zai gordeta:

 zoaz, eiztariaren

 besoeta.

 Zorion-iturrira

 zoaz, maite,

 nai anbat ur edatez

 ase zaite:

 edan, ez zaitu ur orrek

 ilko, maite.