Jose Luis Edertasunak saldu zaitu
1
Goizean aldamura
lasai urreratu
eta zuri begira
egin naiz geratu
zure kantu goibelak
egin nau kezkatu,
orain arte nolatan
ez naiz konturatu.
2
Kaiolan sarturikan
malkoak begietan,
zangotxoak dardarrez
justutik zutikan.
Abesteko ez dezu
ia gogorikan
zu hala ikusteaz
pena det egitan.
3
Galdu da zure poza
ta zure kemena
ta orain ezin izan
gaztetan zinena.
Alperrik itto dugu
zure bizi dena
ondo merezi dezu
gugandik omena.
4
Zure arraultzetikan
atera orduko,
gizonen atzaparrak
zintuen helduko,
askatasun nahiari
eginikan uko
burdin sare horrekin
egin zenun topo.
5
Lehen ederra zinen,
ala zera orain
beste kulparik ez da
erori zure gain,
hori dela medio
zuri hainbat irain
inbidia zegoen
zu noiz jaioko zain.
6
Jaiotza ta heriotzan
arteko zubia,
inoiz ez da zuretzat
izan miraria,
zuk ezagutu dezu
benetako egia
bertan aurkitu duzu
zure hilobia.
7
Jaunak egin zintuen
bi egoeren jabe
bainan geldotasunaz
gogorturik daude,
egoismoagatik
gizonen mirabe
horrek ekarri dizu
hamaika nahigabe.
8
Begira jarriz gero
zu hodei ertzera
askatasuna zer dan
konturatzen zera;
txori guztiak egan
gora eta be(he)ra
une jakin hortan zer
sentitzen ote da.
9
Burutapen bat badet
nik azkenaldean
hemendikan aurrera
uztea librean.
Bildur naiz ibiltzea
gero nora ezean
egunez gose eta,
bakarrik gauean.
10
Baten bizitzarekin
ezin da jokatu
zugandik besterikan
ezin det eskatu.
Egina ezin den arren
inola orekatu,
barkatzerik a(ha)l bada
mesedez barkatu.
|