Aupa Zumaia
Iturtxo
«Aupa Zumaia» oihukatuaz
hastera noa kantuan,
gure mutillek egin dutenak
merezi duelakuan;
zumaiar denok amets haundiak
aurretik bagenituan,
tenporada hau bukatu dugu
pozak ezin kabituan.
Zumaiak aurten egin duena
goaz zerbait aipatzera,
Euskal Herriko gaina harturik
jo du España aldera;
hiru mailatan irabaziaz,
hori duk hori aukera!
trinaua, batel, trainerilletan,
hiru banderak etxera.
Bitarte anaiak, Agerre, Argoin,
Ardantza ta zestoarra
Etxeberri ta Uzkudun, Perez,
Patxi ta Martin azkarra;
Lokatza, Aizpurua, Gorria, Aristi,
gure patroi zumaiarra,
Kantauri zarrak ezagutu du
koadrila honen indarra
Arraunlaritza euskaldunari
antzinatik datorkio,
gizonak hortxe agertu ohi du
noraino duen balio;
trinau bizkorrak azaldu dira
Kaiku, Santurtzi, Orio,
baina zenbaiti Telmo Deunek
popa erakutsi dio.
Beste batzuei egunkaritan
egin zaie propaganda,
azkenerako, noizbait behar ta,
etorri da zuen txanda;
herri osoa, zar eta gazte,
musika eta txaranga,
kantu ta dantza, zelebratzera
kaleak bete joan da.
Donostiarrek estropadetan
dute fama merezia,
«Concha» aldeak beregan baitu
paregabeko grazia;
baina aurtengoz galdu digute
lege ta kontzientzia,
beti bezala, errujabeak
pagatu du justizia.
Matximentatik Zumaiaraino
bazegok indarra franko,
euskaldun gazte trinko lerdenak,
buru, gerri eta zango;
aurrera ere, bazekiagu,
ez dezute egingo planto,
zuen azainak hego-haizeak
ez zizkiguk eramango.