J.R.Ansaren oroitgarri
Iturralde, Joxe Mari
Ez zaizu ahaztutzen
Andoaingo herrian,
nola utzi zinduten hilik
bide bazterrian;
Urbanetatik gora dagoen
Xoxoka bidian,
han agertu zen gorputza
hurrengo goizian,
eta herria utzi zenduan
zuk negar batian.
Gazte jatorra omen zinen
entzuna dedanez,
bainan bizia ken zizuten
nahiz errurik ez;
sendi eta lagun denak
utzirik nahigabez,
«Jauna» eskatzen ditugu
gaur zuri bihotzez,
jaso dezazu zeruan betiko
atseden emanez.
Zoritxarrez zenbat dira
zu bezala joanak,
zergatik jakin gabe
bizia emanak,
hontaz zerbait badakigu
gaur euskaldunak,
baita ere nor diren
gaizki nahi digutenak,
ardi larruaz estalirik
hain otso diranak.
Bizia errespetatzea
ez al da lehenengo?
bakoitzaren pentsakera
horren hurrengo;
gu bestela ez gara
hontatik irtengo,
loturak ere ez ditugu
sekulan etengo,
muturka baldin bagabiltz
hango eta hemengo.
Denborarekin denak
egiten dira ahaztu,
bainan indarkeriak
gauza onik ez du;
zein gara bati bizia
egiteko moztu?
Zer arrazoiak hortara
gaituzte behartu?
Gaur elkar ezin ikusia
ez al da indartsu?
Hainbat arraza gara
eta hainbat kolore,
bainan denak eman behar
zerbait amore;
nahiz horrek jartzen duan
pertsona asarre,
ondo pentsatzen jarririk
ez gara batere,
guk horrela ibili behar
ala eta guztiz ere?
Ekaitz batek ondoren
eguzkia ez al dakar?
Bitartean euskaldunak
izan danok alkar;
lehenago igaro ditugu
hainbat urte zahar,
askotan obe izan arren
ahaztutzea azkar,
nahi eta ere axolagabekeriaz
guk inolaz ezin har.
Eska dezagun denontzat
pake eta ogi,
gezurra oinperatuz
egia indar bedi;
ikus dezagun bide zuzena
argi eta garbi,
bestela alferrik dugu
hainbat izerdi,
berdin jarraitu ezkero
gizaldiz gizaldi.
|