Gure Eleiza, atetik asi
Iraola, Malen
-1-
Gure Eleiza, atetik asi,
ta degu txit moldatuta,
barrua berriz, aulkik jarrita,
guziz ongi osatuta.
Erritar guztik eskertzen ditut,
nere biotza poztuta;
bere laguntza azaldu baitu
diru-poltsa astinduta,
danak kontentu gelditu dira
silla zar aiek kenduta!
-2-
Ai, Aduna'ko Eleizak ba-zun
pixkat zertan apaindua,
orregatikan ipiñi degu
oraingo lege-modua.
Gure eleiz au sarri izan da
orrelaxe lagundua;
beretzat beti izan baitegu
maitetasun txit gartsua,
eutsi deiogun oitura oni
izan ez dadin galdua!
-3-
Agur, adunar anai-arrebok,
entzun, arren, nere kanta,
or aldarean txit maitagarri
daukagu Zeruko Aita.
Zuri, Jaungoiko, tori eleiz au,
zure bizi-leku da-ta,
Zuregatikan eta Zuretzat
jarri degu apainduta.
-4-
Gaurko eguna tontortxo ontan
egun gogoangarria,
argiagoa ikusten baitet
Zaindariaren par-irria.
Zure oñetan, pozik, Amatxo,
daukazu zure erria,
Aduna osoak eskeintzen Zuri
etxe apaindu-berria.
-5-
Argi diztirak dira nagusi,
azpiratu da illuna,
«Belkoain» eta «Merbea» azpian
zeru txiki bat Aduna.
Eta zerutxo loratsu ontan
eleiz eder au gallena,
Eskerrak, Jauna, eldu dalako,
au ospatzeko eguna,
Ementxe Jesus eta Amarentzat
uzten degu biotz bana.
-6-
Txanpona pranko xautu da emen
zure omenean, Jauna,
berriro ere ZU goratzera
gatoz apal Zuregana.
Begira errukiz, Aita maitea,
zure aurrean, Aduna;
baserri ta etxe, famili danoi
opaiguzu onespena,
izan dezagun orain da beti
egiazko zoriona!
-7-
Eleiz onetan egin ditugun
lan eta gastu guziak,
eskeintzen ditut, danen izenez
kaliz orretan nasiak.
Berritze onen laguntzalleei
Jauna, zabal goiko atiak,
merezi dute, eman ordañez
betiko zeru-sariak.
-8-
Une auxe da Meza partean
Jauna, esker emateko,
Zure gorputza ta eleiz eder au
eman dizkiguzulako.
Osasun danak Jaunagandikan
datoz; aitortu bearko!
nik Adunaren izenean ba
biotzez Eskarrikasko!