Joxe Juakiñ
Iraola, Victoriano
Zeiñ dan pelotariyau
nere ustietan,
denok ezagututzen
degu urtietan.
Ibarran jayua da
onlako umia,
lenaz deitzen ziyoten
Paskualen semia.
Luzeko sakalari
esku gogorduna,
pozikan artzen zuten
onlako laguna:
sei ontzako pelota
sakatzen luzian,
noiz nai sartzen zubela
aidian losian.
Errebotian ere
etzan egoten lo,
ongi irabaziyak
ditu zenbait chalo;
saketik lautatik bat
antzuben pikara,
errestalariyari
sartubaz ikara.
Orain jokatutzen du
guantez eta chestoz,
blekan, irabaztera
baldin ta bazatoz,
ez etorri partida
ustian oztuta,
nai ez badezu jira
boltsatik ustuta.
Onra aundikua da,
pelotan beti fiñ,
ez da iñoiz dirutan
saldu Jose Juakiñ.
Iñori ezer kendu
gabetanik, orra,
au da plaza denetan
pelotako onta.
Gazte pelotariyen
kontra oraindikan,
blekan jokatutzen du
guztiz gogotikan.
Chit ederki dakizu
Jose Juakiñ zarra,
gaztiari pelotan
moztutzen bizarra.
Zure onran deitzen det
gogo onarekiñ,
biba euskaldun zarra,
biba Jose Juakiñ.
|