Mendian galdu direnei
Xalbador
-I-
Gauza triste bat publikatzeko kantatzerat naiz abian;
horra zer berri zabaldu zaukun berriki Eskual-herrian:
laguntza faltak berekin duen panramenaren erdian,
hiru gizonak beren bizia galdu dutela mendian.
-II-
Etziren gure arrazakoak mendian galdu diranak,
Jainko Jaunaren bixtan ordea anaiak girade denak;
kolorez beltzak izana gatik, heiek ere ama banak,
bertzek bezala sofriturikan, mundu huntarat emanak.
-III-
Afrikatikan hunat zatozin, eginik bide luzea;
ezin jasana zuketen nunbait herriko ezin bertzea;
beren bizia hobetu nahiz, gosez ta hotzez hiltzea;
bas'ihiziek gorenaz dute holako heriotzea!
-IV-
Diru zutano laguntzaileak bazituzten ene ustez,
bainan zonbaiten karitatea egiten da diru hutsez;
hartarik kanpo axola guti bertzen arima gorputzez;
gauza horrek nau orroitarazten Judasez eta Jesusez.
-V-
Ezin bertzea berekin dauka betitik herri pobreak,
kanpo jendea tirriatzen du bizi modu bat hobeak;
haren ondotik zabiltzalarik, hil dira dohakabeak...
Ai! Ezpeletan aurten nolako primaderako loreak!
-VI-
Bas'ihiziak gerizatzeko badute lege bipilik;
keietan zonbait ihiztatzeko ez du gizonak pegilik;
eta jendeak norbaiten faltaz mendian goseak hilik...
Lege horien sustatzailleak gelditu dira ixilik.
-VII-
Boteretsuak ilargiraino igan zauzkigun orduan,
nehoiz bezanbat injustizia ikusten dugu munduan:
batzu dirutan emokatuak, gako guziak eskuan,
eta bertzeak ogia galez biziaren irriskuan.
-VIII-
Dirua deno gure nagusi, ikusiren da holako:
aberatsentzat ateak zabal, hersi pobrearendako;
iduditzen zaut, gizona bada errepotxurik gabeko,
bidea libro behar lukela nahi lekurak joaiteko.
-IX-
Arrotz horiek horrela hiltzen ikusiz gure artean,
nolaz eduki ginezake guk kontzientzia bakean?
Orroit gaitezen, atsalde batez, Galbarioko mendian,
gu guzientzat hil zela Jesus, kurutze baten gainean.
-X-
Jesus maitea, otoitzez nago kurutzearen oienetan,
ixuri duzun odol saindua ez dadila debaldetan;
gure lurrean hil zure haurrak harzkizu, otoi, besotan,
arraza besex eta mugarik ez den erresuma hortan!