Gaur, izakera desberdina da
Xalbador
Gaur, izakera desberdina da
nola gauetik eguna,
Baina bakoitzak eraman behar
Jainkoak eman diguna,
Nik hori nehoiz ezin dut gorde,
ene aurpegi iluna,
Gorputza latza badaukat ere
bihotza daukat biguna.
Asko alditan atsegingarri
zuentzat izan beharrez,
Alaiarena egiten dakit
maitasunaren indarrez,
Baina barrua goibeldua maiz
mundu huntako gaitz txarrez,
Alai agertzen naizela ere
bihotza daukat negarrez.
Zuen zorionok pozten nau,
ni ez naiz gizon bekaiztia,
Baina barnetik senditzen ditut
ongia eta gaizkia,
Ez naiz izar bat, hori badakit,
ez-eta ere iguzkia,
Baina horrela har nazazue,
hori da naizen guzia.