Gabon-bertso berriak
Ikimaku
1.
Badator ordua
maitasunezkoa
kanpai triste batzuen
amabitakoa.
Lurpean dago gaur
gizonen gradua
ez bai degu maitatzen
aldamenekoa.
2.
Gizon bat jaio zan
koskak berdintzeko
arkaizpe illunean
azaldu zan Kristo.
Haren kontsejua
alkar maitatzeko
txiki eta haundiak
pareratutzeko.
3.
Haurtxo txiki hura
haunditu zanean
zintzilik jarri zuten
Golgota mendian.
Azken arnasaren
momentu berean
"Barkaiezu deneri"
zion Gurutzean.
4.
Gabonak dira ta
zertan ari naiz ni
garizuma kontuak
azaltzen zueri.
Agertu nahi nuke
argi eta garbi
zer gertatzen zaion
egi zaleari.
5.
Ez zaitezten asper
bukatzera noa
bainan entzun zazue
nere erregua.
Izateko denok
maitasun beroa
eta ez baztertzeko
pobre ta txiroa.
6.
Denda guztietan
jostaillu politak
Erregeak datoz ta
zabaldu leihoak.
Pozik ikusten dituk
negozianteak;
goibel eta tristerik
lagun langilleak.
***
1.
Oitura zarrak
badute oraindik
indarra gure artean.
Hori dala ta
hemen gabiltza
bertsoz eta kantuetan
Gabon usaia nabaitzen degu
ata eta leiho danetan.
Zerbait haundia ospatzen dala
esango nuke gau honetan.
2.
Bixigu errea labean dago
konpota berriz leihoan.
Laister bilduko gera guztiok
sukalde epel goxoan.
Abenduaren ogei-ta-lauak
elkartzen gaitu maiean,
herri osoa bildu gaitezen
pakearen atarian.
3.
Laiņo illunez estalirikan
ikusten degu herria,
langille asko balantzan daude
hauxen da gure larria,
Gauzak okertu zaizkigu eta
dator istillu gorria,
ikus zazue nolakoa dan
langillearen saria.
4.
Mendiko ontzen oihuarekin
elkartzen gera gau hontan
eta karraxi egiten degu
hotzaren atzaparretan.
Zuzentasunik ez da ikusten
jaun haundien empresetan,
pixu guztia jartzen bai dute
mendekoaren gaiņean.
