Agur! euskaldun zahar eta gazte
Agur! euskaldun zahar eta gazte
Santa Ageda egunez.
Beti bezala kantari gabiltz
ohiturari erantzunez.
Gure herriko egoera hau
aldatu nahirik zentzunez
nahiz ta sarritan gure oihuak
behar bezala entzun ez.
Lehen bat izana hiru zatitan
banandu digute lurra.
Geure etxeko jabea, horra,
estranjeriko lapurra.
Tokatzen dena eskatu eta
erruki gabe egurra;
pakezaleak bagina ere
sartu digute beldurra.
Telebista ta irratian da
agintarien indarra.
Egunkari ta aldizkariak,
dirua jabe bakarra.
Gezurra eta propaganda da
helburu eta zustarra,
non ote gure txalaparta ta
mendietako adarra.
Zerbitzu honek ondoren dakar
eskubideen lotura.
Menifestapen zapaldu eta
komisariko tortura;
espetxeetako burni tartean
kriminalaren itxura,
gure etxean bizi beharra
esklaboaren modura.
Santa Ageda eguna dugu
herriko ohitura zaharra.
Kantuz ematen bakar-bakarrik,
gaur egun ez da samurra.
Herri honetan dagon beldurra
zapalketa da bakarra,
langileria bat egin eta
elkartu zuen indarra.
Errekastoei gardentasuna
darie bere ur garbian.
Ez da argitasun bera izaten
komunikazio iturrian.
Telebista eta egunkarian
baita ere irratian,
berri emaleen joko ilun hori
handi-mandien azpian.
Kideko diren gobernu artean
paktu ta akordio ugari.
Bitartean gure herrietan
hiltzen hainbeste gudari.
Torturak eta kartzelak dira
bihurtzen askoren sari,
gorrota eta dirua izanik
sarraski hauen gidari.
Gure hizkuntza izan da beti
askoren herri eskabide
Baina juizioz eta abarrez
epaitzen da edozein kide.
Kultur borrokan saiatu behar
lortzeko da beste bide,
Adierazteko askatasuna,
mintzaira ta dadin libre.
Gure kultura eta ohiturak
nahi baditugu altxatu,
derrigorrean borrokarekin
beharko gara mintzatu.
Garai batean harmak hartzeaz
ez gara inoiz lotsatu
indarkeri ta injustiziak
gaituzte hortaz bultzatu.
Hitz polit eta promesa asko
herria konforma dadin,
konsejo eta engainuakin
ohituak gaude aspaldin,
borroka gabe ez dago ezer
bezate guztiok jakin,
limosna edo antzerakorik
ez dugula nahi Euskadin.
Agur! berriro euskaldunari
agur ta erdi benetan.
Gaur hemen kantuz gabiltz
baina
herria dago penetan.
Baldin badago aberriaren
odolik gure zainetan
hartu eskuan ezpata eta
irrintzia ezpainetan.