In domino confido

 Jaunagana dut nik ustea;

 zergatik diostazue:

 "Iges egizu mendira,

 txori batek bezelaxe?

 Orra! beren makoa teink

 dadukate obendiak,

 geziontzian gerturik

 jarri dituzte geziak,

 ixilki gezikatzeko

 biotz-zuzen ta garbiak.

 Jasoñak bota dituzte,

 ta zuzenak zer dagike?"

 Jauna eseria dago

 bere jauregi sanduan,

 Jaunak bere jauralkia

 antxe daduka zeruan.

 Txiro ta landerrei bea

 dagozte aren begiak,

 aren betazalek tuzte

 ikertzen gizon guziak.

 Jaunak ikuskatzen ditu

 berdin onak ta gaiztoak,

 gaizkia maite duena

 iguin du aren gogoak.

 Jaunak erauntsiko ditu

 obendien gain ikatzak;

 sufre, su, aize-burrunbak

 dira oien erorkiak.

 Zuzena baita Jainkoa,

 zuzenbidea du maite;

 aren aurpegi argia

 zintzoak ikusten dute.