Ertamerikari

Hartza

 Gringoak eta mexikotarrak

 auzo dituk iparretik

 Venezuela, Peru, Colombia

 ta Argentina hegotik

 edertasunez hasea hago

 itsas Cariben besotik

 baina interes gaizto gehiegi

 nola dabilen azpitik

 Ertamerika,lurralde jator

 iraungo ote duk zutik.

 Zazpi herriek osatzen dute

 gaur egun Ertamerika

 arbaso berak, jende berdiña

 elkar artean harrika

 bat Guatemala, herri zaharra

 ondon Belice zirika

 El Salvador ta Honduras berriz.

 beti elkarri irrika

 Nikaragua, iraultzailea

 Panamá ta Costa Rica.

 Hasi gaitezen banaka hartzen

 herri hauen egoera

 Ai Guatemalan edertasunez

 inoiz nekatzen ez gera

 Arbaso «mayak» hor sortu ziran

 gizartearen hasera

 gaur militarrak agintzen dute

 ta zer daiteke espera

 ezkaxia ta gosea dira

 heriotzaren bezpera.

 Belice dugu Ertamerikan

 naziorik gazteena

 zaharren artean alaitasunez

 haize berriz datorrena

 burujabetza lor berria du

 sobrante dauka kemena

 Ertamerika guztin bezala

 falta zaie ia dena

 denen artean partitu behar

 gutxi batzuek dutena.

 Pazifikoren itsasertzea

 El Salvador dago larri

 jendea gosez hiltzen ari da

 militarrak agintari

 diktadurari hortzetan joka

 gerrilla gogor da ari

 armak hartuaz salvadoreriok

 iraultza bidean jarri

 represioa gainditu nahirik

 askatasunez egarri.

 Aipatu diran hoien ondoren

 Honduras dugu bestea

 amerikanok sartuak daude

 zabalik dute atea

 zerjana gutxi,mixeri asko

 eta sarritan «golpea»

 gringo-yankien laguntzarekin

 militarrak agintea

 bien bitartean politikoek

 nahiko dute antzeztea.

 Lurralde eder, langile jator

 sufritzeaz dakizuna

 Lurrikara ta Somoza ziran

 benetan karga aztuna '

 egun batean hartu zenuen

 biderikan seguruna

 Sandino hartuz gidari eta

 iraultza zure laguna

 Ai Nikaragua, zorioneko

 esnatu ziñan eguna.

 Ertamerika guztia dugu

 USAren larrain zikiña

 etxeaurrea garbitzea da

 Costa Ricaren eziña

 gringo arroen atzaparretik

 bide,gehiegi egiña

 dolarren menpe iraun beharra,

 zurekin daukazun miña

 beste herri bat izango ziñan

 nortasun jabe ba ziña.

 Nola txalupa itsas ertzean

 horrela dago Panama

 nortasun asko ez izan arren

 negozioak darama

 puerto frankoak eta kanalak

 eman diote ia dena

 salerosketa eta trukea

 dira beraien lana

 panameñoek berekin dute,

 kontrabandoaren fama.

 Hamar bertsotan agertu ditut

 euskaldun baten larriak

 Ertamerika etorri nintzan

 horra bertako berriak

 nolabait ere hase nahi nitun

 behintzat nere egarriak

 hauexek dira, euskaldun maite

 hartzaren ttantto urriak

 oraingoz gehio ez du ematen

 nere bertso iturriak.