Haizea
I
HAIZEA,
INDARRAREN ATSEGINA.
Hire baitan
atseden oinazetsua
aurkitu diat.
Hire barruan
ikusezinezko begiak
ikusiko dizkiat.
Hire arnasan
biziaren hazia
nerenganatu diat.
HAIZEA,
INDARRAREN ATSEGINA.
II
HAIZEA,
OINAZEZKO LURRUNA.
Hire hizkuntza
hire ezerezean
murgildu duk.
Dauzkan doinuak
nere hitz nahastuen
hilobi isila duk.
Hitaz zeuden tantoek
nere malko hotsak
isili zizkidak.
HAIZEA,
OINAZEZKO LURRUNA.
III
HAIZEA,
EZEREZEAREN HUTSA.
Iluntasunaren iluntasun
aurkitutako
lehen oihua.
Itsasoaren bakartasunik
sortu den
deihadar ikaragarria.
Ahorik gabeko
herri baten
garrasi isila.
HAIZEA,
EZEREZEAREN HUTSA.
IV
HAIZEA,
GORPUTZA BILUZIK
Udaberriak zapaldurik
hiregan errotuz,
indarra sortu diat.
Eguzkia menperatuz,
ia hitzik gabe,
higandik kanporatu nauk.
Elur mahatsa zanpatuz
bizi ardo garratza
eskaini diat.
HAIZEA,
GORPUTZA BILUZIK
V
HAIZEA,
MIN GOZOA.
Hire leguntasunak eragina,
iraganako mornentu mingotsak
nere aurretik pasa dituk.
Nere barruan hik ikusitakoa
nik daramadan argia,
eta argizko egun tristeak.
Nire itzal goibelpean
hain pozik igaro diren
egun itun mingarriak.
HAIZEA,
MIN GOZOA.
VI
HAIZEA,
HOTZAREN HOTSA.
Hire animaren hatsak
-arratsaren hotzak-
kutsatu zidan.
Eta hitaz maitemindurik
irriparrezka,
lotsezko irriparrez.
Hire muinaren hotsak
-goizaren lotsak-
eragin zidan.
HAIZEA,
HOTZAREN HOTSA.
VII
HAIZEA,
LURRAREN ATSEDENA.
Ez diezaiogula inoiz
alkarri galde
nondik gatozen, nora goazen.
Ontzi ezberdinetan
bainan ezti berdinaz
bazkal dezagun.
Lur madarikatutik gatoz,
lur bedeinkatura goaz,
denok bidean lagun.
HAIZEA,
LURRAREN ATSEDENA.
VIII
HAIZEA,
NATURAREN AHOTSA.
Hitz jaurtikietako
lumadi haserrea
eta gugatik sutan jarria.
Olatuen eraginaz,
guengana heldu zaigun
itsasmugida indartsua.
Gure malko ixuriengatik
lurretik atera den
lurrikara izugarria.
HAIZEA,
NATURAREN AHOTSA.
IX
HAIZEA,
EGUNAREN LOA.
Hire ilargi berdea
zainduz eta laztanduz,
elkarri bakea eman.
Batek bestea aurkituz,
batek bestea zigortuz,
inoren beharrik ez izan.
Hire indarrez, ahotsa;
hire arnasez, nere hitzak;
inori ezer ez esan.
HAIZEA
EGUNAREN LOA
X
HAIZEA,
GAUAREN ESNATZEA.
Gaur, loak utzi nauenean,
maitasunaren indar guztiez
agurtu haut.
Gaur, esnatu naizenean,
isiltasunaren doinu guztiez
agurtu haut.
Gaur, bizitzen hasi naizenean,
bakartasunaren oihu guztiez
agurtu haut.
HAIZEA,
GAUAREN ESNATZEA.
|