Herriko alkate banintz
Gesalaga, Jose Antonio (Zaldubi)
Herri honetan arazo anitz,
eta askotan galduta gabiltz,
gure artean sarturik dugu
ezin kontatu hala gaitz, (bis)
gainetik hainbeste ekaitz,
dardaraz etxe ta haritz,
hutsa onerako balitz,
gainez sarritan asmo onenak
bihurtzen dira ameskaitz,
baina herria zerbi nahi nuke
HERRIKO ALKATE BANINTZ. (bis)
Konpondu nahirik hainbat zoritxar,
egon behar da hainbeste indar,
pake santua behingoz harturik
zuzenbide edo izar, (bis)
hori bait da horratz-ifar,
zertarako su ta txingar?
elkartuz ezker-eskuindar
egin dezagun lana guztiok
frutu emateko bihar,
eta eskua leial emanaz
jasoko dugu ELGOIBAR. (bis)
Langintza hontan saiatu denak,
emanaz zintzo zuen ahalmenak,
izan gaitzen, ez oilar baizik,
zerbitzari apalenak, (bis)
nahiz ta elkartu laurdenak,
bilduz gero leialenak,
ken ditzagun zoramenak,
etorkizuna gurea data
ezin gelditu azkenak,
lan asko dago ta egin gabe
ez gaitu hartuko penak (bis)
Alkate honek lan berezia,
ez dakit nola nik merezia,
hautsi nahi nuke herri honetan
anai arteko hesia, (bis)
zertarako malezia?
zoritxarreko gezia,
gero elkar ihesia...
bildu gaitezen elkarrengana
langile ta burgesia,
era horretan buka daiteke
daukagun langabezia. (bis)
Lana egin nahi eta ezina,
aspaldi hontan gauza jakina.
langabeziak familia bat
uzten bait du desegina, (bis)
ez da lanbide arina,
horrek badu eragina,
bihotzeraino sumina,
ezin bukatu inolaz ere
umeen negar zotina,
zin egiten dut emango dela
Udalaren ahalegina. (bis)
Zergatik duzu kopet zimurra?
Eta hestua zure zintzurra?
- Langabeziak sartu ohi bait du
hezurreraino bildurra. (bis)
Noiz arte? Ez da ziurra,
baina hartu du gailurra,
jendea dago kizkurra,
ta eman behar Udaletxeak
luma edo ta haitzurra,
elkar lagunduz ari garela
izan dadila ikurra. (bis)
Daukagun lana ezin da galdu,
eta gu izan gaitezen malgu,
Udaletxeko proiekto batzuk
behar ditugu azaldu (bis)
jolastokiak zabaldu,
lurrak erosi ta saldu,
asmo eskasenak salbu,
ingurumena hobetze arren
jarrerarik ez itzaldu,
gure herria dotoretzea
beste asmorik ba dal du? (bis)
Baina hau ez da sarri erraza,
poltsa ez bait da horren kapaza,
baina herria prest dago eta
laguntza ez da eskasa, (bis)
hobetu kale ta plaza
egin dezagun solasa,
ta ibil gaitezen lasa,
ingurune bat euki dezagun
gozo hartzeko arnasa,
eta umeek jolastegitan
egin dezaten jolasa. (bis)
Entzun umeen jolasen farrak,
kolunpiotan din, dan edarrak,
jolasten beti heltzen zaizkie
nahi gabe ilunabarrak, (bis)
ez dira hortan baldarrak,
nor gehiagoka azkarrak,
nahiz eta izan kazkarrak,
lorategian jolas daitezke
lagun gisa herritarrak,
eta atzetik begiratuaz
irrifar eginez zaharrak. (bis)
Kultura ere guk behar bultza,
al den neurrian beti goruntza,
era horretan sendotu dadin
herriak duen gorputza, (bis)
arren ez hartu zaputza,
ez delako amets hutsa,
baizik oinarri ta funtsa,
Euskal Herrian gure kulturak
noizpait behar du maisutza,
zabal dezagun herrian zehar
gure herriko hizkuntza. (bis)
Ez dakitenei eman aukera,
ikas dezaten gure euskera,
eta euskaldun direnak berriz
joan alfabetatzera, (bis)
herriak duen jarrera,
txalogarria da bera,
kultura doa aurrera,
ta kanpokoak integratzeko
eten dezagun barrera,
era horretan igoko gara
mendiaren gailurrera. (bis)
Helbururaino iritxi arte,
bideek neke franko dakarte,
baina askotan hortik jotzeko
asmoek esan didate, (bis)
lan egiten hartu parte,
ez bait da izango kalte,
jo herriko zenbait ate,
etorkizuna ez da izango
bide hortatik aparte,
herri paketsu bat litzateke
izango banintz Alkate. (bis)