Udazkena!

Garbizu ta Salaberria, Jon (Zubigar)

 Una non diren osto politak

 zugatz gainean erdoildu,

 xurtoinetatik askatu eta

 airean dabiltz jostailu;

 len eze ziren adar gainean,

 orain gaxoak orbeldu

 ta zugatz eder, orlei, bikaina

 gorri, soil, ikusten dugu.

 ­Udazkena, Udazkena:

 egin bi urrats aitzina

 urrats bat ein-ta duguna

 dalako negu gordina...!

 Iguzkiaren izpi urreak

 erdi-ilun dire ikusten,

 txori alaiak zugatz gainean

 ­ez len bezenbat abesten...!

 nere leioa idekitzean

 ez dut enara nabaitzen

 eta barnean biotz ilunaz

 erdi-minez naiz gelditzen.

 ­Udazkena, Udazkena:

 egin bi urrats aitzina

 urrats bat ein-ta duguna

 dalako negu gordina...!

 Lore guziak zimeldu dire

 landa-zelaiak gorritu,

 ortze urdina odei beltz aundiz

 estali eta ilundu;

 neska-mutilak len bezenbat maiz

 ez dira iturrian bildu

 Udazkeneko gau ilun unek

 nonbeit ikaratzen ditu.

 ­Udazkena, Udazkena:

 egin bi urrats aitzina

 urrats bat ein-ta duguna

 dalako negu gordina...!

 Intz ederdun zen goiz bikain ura

 ez da inondik agertzen,

 ilunabarrak len bezenbat poz

 ez du beinere ematen;

 oraiko aldi untan ez dugu

 olerkaririk ikusten

 biotz-pozkari diren gauzarik

 samur ta goxo idazten.

 Udazkena, Udazkena:

 egin bi urrats aitzina

 urrats bat ein-ta duguna

 dalako negu gordina...!

 Borda atarian artzain sendoak

 biotz ilunaz dagozi

 Udazkenaren ondorioa

 tzarra dute-ta ikusi

 mendi gaineko txabol zaarra

 orgatik dute ideki,

 negu gordina igarotzeko, on

 zaie-ta bera iduri.

 ­Udazkena, Udazkena:

 egin bi urrats aitzina

 urrats bat ein-ta duguna

 dalako negu gordina...!

 Lore usaindun alaigarria

 basoan galdu denean,

 gaztaina eta ezkurra biltzen

 baso untan ikustean

 erranen dute geuren biotzak

 isilki barne-barnean

 "­­Uda aldatu da ta Udazkena

 dugu ilunki gainean...!!"

 ­Udazkena, Udazkena,

 olerkariaren mina:

 egin bi urrats aitzina

 Udazkena, Udazkena...!