Udalen beltza!
Zubigar
Txorikumeak jaioak dira
basoetan
ta epel daude ama samurren
egopean,
a! baña txori ama-umien
Egillea
odoltsu lertzen mendi gañeko
gurutzean!...
Zuaitz aundiak jantzi berriaz
edertuak
agertzen dira lili ta orriz
ornituak
ta Egillea billoizik burniz
zulatua
odol-iturriz gurutzepea
gorrituaz!...
Lore guziak zabaldu dira
belardian,
bildotx otzanak jaio ere bai
lorartian
baña jabea arantz zorrotzez
txit josia.
Biotz deun ura beazun tontoz
igurtzia!...
Oyanetako iturrietan
arkumeak
edaten daude artzai ta artaldez
pagopean;
ta Artzai Nausia ito zorian
gurutzean
«Sitio»! deika, zurbil, Golgota
gallurrean!...
Udaberia...; eguzki printzak
distitsuak
agertzen dira ortziko odeiak
garbituaz
ta Buruzaia entenga lodiz
urratua
illurren dala... begi lausotu
odoltsuaz?...
Belar berriak tarteak liliz
pitxiturik
azaldu dira Mendi gain artan
guri guri
baña Jainko odol ixtil aundian
gaur igeri
dabiltz guziak...! au bai degula
negargarri!...
Jauna'k eindako inguma txuri
pozgarriak
jostatzen dabiltz orlegi dagon
belardian
ta Jaunak zurbil... ubel... negartsu
Arpegia...;
auxe bai dala udalen beltz ta
mingarria...!
Udalen beltza..., ziñetan beltza,
Egileak
azken asnasa oraintxe eman du
gurutzean.
Ama-minduak Seme odola
guruzpean
tantoka artu du zaurietatik
erortzear!...
Seme kutunak ixuri duan
odol putzuz
Biotz puska bat erortzen dala
ikusi du
ta au ikustean Berea ezin
eduki du
ta agitz mindua gurutz oñean...
lurra jo du...!!
Inguma, txori, lili, pitxiak
ezin poztu
Egille Bera gurutz-gañean
il ba'zaigu.
Ark udalena eder ta polit
egin digu
baña dollorrak Bera erailtzez
belztu degu...!!
Gureganako naitasun bizi
ta sutsua
agertzen il da, «Sitio»! deika
il orduan!
ta itzok esanaz ubel geldi da
illoztua
gurutzepeko Ama'ri beira
makurtua!...
Udalenaren berezko poza
itundu da
bere aldiko samurtasunek
gogortuaz.
Udalen beltza..., ziñetan beltza
daukagu ba
ta jolas ordez... otoi dagigun
damutuak!!...
Olerkariek udaberrian
negargarrizko mintzoa?...
aro onek nonbait arantza euki
samurtasunen kolkoan!!
