Ikasi
Zubigar
Malkar-ertzeko lar mordoetan
sasi-arrosak apainki
txuri txuriak agertzen dira
loretan lilluragarri.
Ta zorrotz diran sasi-mordoak
samur dauzkate gañetik
berdingabeko likurt gozoa
boteaz beren mamitik.
Sasi mordo onek inguma ariñez
jositakoa dirudi
noizipein orri txuri batzuek
aldatzen dirala arinki.
Arrosa txuri panpiñetara
erlea ere an doa
beren gañean eztiki ona
gozo edoski asmoan.
Ta berdingeko samurtasunok
ikustean ain gelgarri
lili politen albo gozora
ume bat doa agitz pozik.
Bañan ai!, bertan lore politok
gozoro biltzen astean
ugari ditun arantz zorrotzak
zulatzen dute umea.
Eta arrosari eltzean laister
jausi zaizkio orritxoak
arantz utsezko txorten zorrotzak
gelditurik eskutxoan.
Gure artean ere askotxo
daude orlako «loreak»
gazte eder, apain azalez, baña...
barruz arantzez beteak.
Eta biltzeko garai latz ura
Jaungoikoari irixtean
Berau etzaigu atzipetuko:
umetxo aien antzean:
ta aranzdun gazte, «lore» politok;
galduko dira, lezean!!