Adiskideak gogoratuz
Iruzubi
-1-
Larogeigarren urtera nua
Jaunari esker lenbizi,
amairu seme-alaben aita
baiña gaur amabi bizi,
ildakoak-e kontatzen ditut
baizik ez aztuta utzi
beste munduko gure anaiak
otoitzaz ditzagun jantzi
Karmengo Amak beti izan dezan
gaxo aientzat erruki.
-2-
Aspalditxoan zimiko asko
daramazkit biotzean
betikoa da au gertatzea
odolekon bat iltzean,
oraiñ banegon ur axalean
lengo penak arintzean
anai-lengusu baten azken
ta lurperatzez oroitzean
ostera miñez eroritzen naiz
akordatu bakoitzean.
-3-
Auxen da gaur gure negarra
beste guztien gaiñetik,
gizon on batek utzi diguna
eriotzaren ondotik,
andretxoari erauzi dio
bere biotza zaiñetik
ta ezin da kendu iñolaz ere
oiñazearen bidetik,
laguntzen diot atsekabean
biotzan erdi-erditik.
-4-
Zintzotasunez urrezkua zan
izatez oso apala,
emaztearen senar maitekor
seme-alaben itzala,
beti etxekoi, beti paketsu
beste asko ez bezala,
euskaltzalea zer esanik ez,
elizkoia, ez makala,
zalantzik gabe esan nezake
Jaunak berekin daukala.
-5-
Emazte gaxo naigabetua
etzazu egin negarrik,
jaiotakoak il bear degu
ez da zurea bakarrik;
seme-alabak zurekin daude
etzaitez jarri gaxorik
zure gizona lotan dago ta
ez du ezeren bearrik,
utziozu bai lo egin dezan
zu zaude ixil-ixillik.
-6-
Naiz eta zuri biotza ebaki
beria dauka osoa,
beti zuretzat gorderik zeukan
anaitasunez jasoa;
aboa itxi ta ixillik dago
beti zan itz gutxikoa
begiak ere ez dute ikusten
lo dago, gizarajoa!
zerutarrakin loak artu du
o o o! zer lo aldi gozoa.