Gora gure esperantza!
Galdakaoko B.E.
Denon aurrean bertsolariok
jo behar dugu turuta,
hasieratik odola dugu
haserre ta berotuta,
Guk euskaldunok euskara beti
gure arnasa dugu ta,
hemen aurkitzen gara berriro
hizkuntza honek deituta.
Euskaldunontzat gure euskara
dugu hizkuntza jatorra
arbaso eta guraso zaharrei
horretan diegu zorra
aurka direnek merezi dute
beti erantzun gogorra,
euskaldun denok elkar gaitezen
ta eutsi daigun enborra.
Gure hizkuntza momentu hontan
aurkitzen zaigu hiltzear,
hil eta gero alferrik dira
hainbeste malko ta negar,
Jende ugari ikasten dabil
herri honetatik zehar,
ordu mordoa sartzen dute ta
gainera ordaindu behar.
Kalean zehar, orain euskera
ez da entzuten hain eraz,
naiz ta agertu hainbeste jende
abertzaleen itxuraz,
zoritxarrean horrelakoak
aukitzen ditugu erraz
euskeraz egin esan umeei
ta eurek beti erderaz.
Euskalerrian euskera dugu
hizkuntza nazionala
horregatikan defenda behar
nahiz eta utzi azala.
Galtzen badugu euskera orain
hilko gara berehala,
Franco pasa zen baina oraindik
mantentzen du bere itzala.
Udaletxeak ta Jaurlaritzak
traba eta kalbario
Euskara bultza egin behar ta
bihurtu dira arerio.
Hauteskundetan euskera aipatu
baina erderajario,
horrelakoak euskarentzat
ez du batere balio.
Guk telebistan jarri genduen
egun batez hainbat xede,
baina hasiak dirade hortik
dantzatzen hainbeste lege,
ez genuke nahi erderaz hitzik
entzun bertan inoiz ere
ta jakin gura dugu behingoan
norantza doan ETEBE.
Telebistaren zabalkuntzeaz
etorri zitzaigun txanda,
anuntzioak ere euskaraz
izango zuten demanda,
baina dirua beti bezala
eragilea izan da
ta lehio hortatik egiten dute
erdarazko propaganda.
Zu Gobernua hemen daukazu
utzi diguzun lehorra
adarren batzuk faltatu arren
sendoa dauka enborra,
ikusi behar duzu gaur nor den
bizkor ta buru gogorra,
nahi ez baduzu ere euskera
da arnasa ta altxorra.
Hamargarren bertsoa dugu ta
gelditu behar da martxa,
denok batera hemen abesten
atera dugu arantza.
Herri zahar honek bere indarrez
egingo du aurrerantza,
egunen baten lortuko da ta
gora gure esperantza!