Gai bat eldu zait aukeran
Gabiria, Luzio
-1-
Gai bat eldu zait aukeran
bertsoz esateko eran,
gure mundu au zerbait aztertuz
goian eta beran,
ez gabiltz lengo tankeran
guraso zarren jokeran,
ikus dezagun gaurko senditan
nola bizi geran.
-2-
Goizean jeiki-berritan
iñoiz alkarri erritan,
gosaldutzeko ere astirik
ez degu erditan,
olako larri alditan
zalaparta ain aunditan
lan lekutara berandu junaz
irutatik bitan.
-3-
Gero jateko orduan
danak alkarren onduan,
alkar-izketa ibili ordez
asarre moduan,
otoitz-oiturak galduan
izparringiak albuan,
azkenerako batek ez daki
zertatik jan duan.
-4-
Gauza berrien egarri
aurrerapenak ekarri,
irrati edo «tele» zarata,
itzik ez alkarri;
kalera juateko larri
au ez al da tamalgarri
sendi batean ez jakitea
gaur alkarren berri.
-5-
Zail da semeak azitzen
bear dan legez ezitzen
ta lanbide au iñoren esku
errez da utzitzen;
artu-emanak gutxitzen
bata besteaz etsitzen,
maitasunari asi al gera
ateak itxitzen?
-6-
Guraso danen ekintza
semeak nundik dabiltza?
aita-semeak, ama-alabak
ez degu nai mintza;
oker ez ote gabiltza?
au da jakitunen itza:
Geure errurik ez aitortzea
degu gaurko gaitza.
-7-
Seme gazteak aitari:
alperrik etzaitez ari,
nai eta ere ezin diguzu
erakutsi guri;
orrelakoak ugari,
arrokeria igari,
bide ortatik gauza zuzenik
etzaigu agiri.
-8-
Jatean eta jantzian
lengo kontuak juantzian,
danok azaldu nai degu emen
aberats antzian;
geratu nai ez atzian,
aundi-naia biotzian,
ixkanbilla ta erritak gero
zorrak azaltzian.
-9-
Zein gauz ederra pakia
urri dabillen bitxia:
«Lengoa ona, ez, oraingua»
bakoitzak beria...
Gordeaz lengo aria,
arturik indar berria,
billa dezagun biotz zabalez
erdiko bidia.
-10-
Mundu ontako joera
bakoitza bere larrera,
urteak joan, ezur-gogortu
oiturak lenera;
gazteak zirt-zart aurrera,
gauza asko golkoz-bera,
neke aldetik dago bidea
egizko pakera.
-11-
Lengua ta oraingua
Egia da betikua,
muñari eutsiz bada alare
zertaz aldatua:
zarra balitz nekatua,
gaztea gaur modakua,
alkar osotuz gurekin degu
Maitasun-Jainkua.
-12-
Munduan bada murantza
bukatutzen ez dan dantza,
nolanai ere daramakigu
gure garai-antza;
batean onuntz balantza,
beste aldean zalantza,
naiko GRAZIA badegu eta
gordo ESPERANTZA.
|