Agur Nafarroa
Anai nafarrak ONDO ETORRI
edo bestela ONGI JIN
zuen erara ala gurera
izan behar baita berdin.
Bizkaiak eta Nafarroak be
izan dezaten, atsegin
gure Bilbo hau bisitatzeko
dizuegu gaur hotsegin
bertsoen bidez anaitasuna
sendotuta gera dadin.
Ekaitz txar batek gure Herrira
muga bat zigun ekarri
Nafarroa be, lehen bat nena
zati bi eginda jarri.
Berriz bai izan gura dugula
egin dezagun aldarri
burruka horitan etengabean
gogoratuaz elkarri
batasun hori lortzerakoan
EUSKARA dela oinarri.
Nafar handi bat uste gabean
zitzaigun hemendik joan
arima ondo gordeta utziz
arrano beltzen hegoan.
Bertsozaleak oraindik dagi
negar Ipar ta Hegoan,
gure XALBADOR biziko zaigu
Herri hontan luzaroan
bere odola mintzo bait dabil
gaur ere gure gogoan.
Handi bat erraz ordeztu dugu
hainbat txiki ipinita
eta XALBADOR zen aren partez
sei ditugu etorrita.
ARGIÑARENA anai nafarrak
hegoaldetik korrika,
ALKHAT ta LACA; MENDIBURU-kin
baxenafartár musika,
ta Lapurditik FERMIN MIHURA
bertsotan ondo daki ta.
Euskal Herria osorik balitz
isilduko ginateke
baina muga ta foru faltsoez
digute gaur, bete-bete.
MENDIBURU-k ta ALKHAT-ek ere
zer esanik ba daukate
baina hiruron partez LAKA-ri
galdetuko genioke:
gaur Nafarroa España bada,
zuek ze kristo zarete?
Hizkuntza dugu gure arteko
lokarririk sendoena
Ama Lurrari lotzen gaituen
zilbor-hesterik azkena.
Bilbon euskarak orain adan du
biziki behar zuena,
ur freskoa ta biziz betea
da bertsoei dariena.
Ezkerrik asko Bilbo-ren partez
hau izan da gaurko dena.