Eiherazain jaunari hamalaukoa

E.M.

 1

 Idorteaz kexu da kasik lur guzia:

 Afrika oroz lehen gose ta egarri!

 Urik gabe zoin trixte munduan bizia!

 Ifernua oraitik piztua iduri!

 2

 Bazter guzietako nigarren artetik

 Eiherazaina dugu airos eta pixkor

 Ura ez zaio falta ondoko nazatik

 Errota dabilkio irinez emankor.

 3

 Nazako ura ez du beti argi-argi,

 Ez etare irina beti xuri-xuri:

 Beharrik du baheak irriaz garbitzen!

 4

 Eiherazain urusa! Segi hola-hola,

 Kondaira zaitzularik gogotik jalgitzen,

 Arroltzea oilotik heldu den bezala!