Udazkeneko negarra
E.
Nere aita zanari
Udazkeneko arratsaldetan
euriari begiraka
luzaro egon oi-naiz ittunki
ortze ederrari galdezka:
"¡Zeru eder oi! ¿zer ote-dezu
ain luzaroan negarka?
ain luzaroan negarka?
Zugatzetako orbel-pilloak
lurrera datozenean,
nere begiak ez dute ikusten
orbelik zugatz-azpian.
Orbel guziak malko biurtzen
nunbait nere begipean
nunbait nere begipean.
Ta zu il zerala bururatzean
¡nere aita maite ori!
biotz-barrena erdibituta,
begi biak malko-ituri,
errekatarte, mendi, aranak,
izar, laño ta eguzki,
guziak, ¡aita! negar batean
iruditzen zaizkit neri,
iruditzen zaizkit neri.