"Terrorismoa" gora ta bera

Izazpik

 -1-

 «Terrorismoa» gora ta bera

 ezpain guzietan dabil,

 eta askoren pentsakerakin

 oso arrituta nabil.

 «Pake santua bear degunok

 bertan nai gaituztela il...

 Bi egun triste bizi bear ta

 erak ezin pasa trankil».

 -2-

 Terrorismoa kondenatzea

 guziok gera beartu,

 Nazio danak ortarakoxe

 bakarrik dira alkartu.

 Guziak ola juzga badute

 bearko degu onartu,

 baiñan gizonen kontzientzia

 bear genduke aztartu.

 -3-

 Zer diferentzi arkitutzen dan

 itz batzuen goraberan,

 disimulozko terrorismoa

 santu paperen jokeran.

 Bizimodua jarri ezkero

 guziontzako aukeran,

 gure artean jakin nai nuke

 terroristak nortzuk geran...?

 -4-

 Munduan jauntxo bizi geranok

 geuretzat jarri aukera,

 Al dala legez babestu geure

 kapritxo ta izakera.

 Gero juzgatu mendeko eta

 gizarajoen jokera,

 terrorista ta disimulozko

 fariseoak gu gera.

 -5-

 Lendabiziko mendeko danak

 lotu soka edo katez,

 gero eskeintza ugari egin,

 ta al bada eman... batez.

 Terrorismora jotzen dutenak

 beren bizitzaren kaltez,

 Nik terrorista gutxi ikusi

 ditut beren borondatez.

 -6-

 Gazte bat berez pentsatzen eta

 jokatzen asi ezkero,

 egurrarekin zuzendutzerik

 ezazutela espero.

 Nik esan gabe zuek jakingo

 zenduten au onuzkero,

 okerragoak jartzen dirala

 kartzelan egonda gero.

 -7-

 ...Golpe batean nai dituztela

 lege guziak puskatu...!

 Ta ori majo bizi geranoi

 nola arraio gustatu...!

 Oien jokera bildurgarriaz

 santu geranok, sustatu.

 Emen iltzaille nor ez dan ongi

 geure buruak juzgatu.

 -8-

 Edozer gauza gertatzen bada

 eskasena da kulpante,

 juzga bearrik ere ez dago,

 kartzelara derrepente.

 Oieri esker asi gerade

 espabilatzen bastante

 bestela lasai biziko giñan

 makiñatxobat tunante!!!

 -9-

 Jokera ori zergatikan dan

 pentsatu dezagun lenen,

 Izango al da, justizia ta

 askatasuna daudenen...?

 Besteri kulpa botatzia da

 beti errexena emen...

 O! ene Jauna, zer jaleoa

 gu juzgatzen gaituztenen!!!

 -10-

 Ez pentsa gero justizirikan

 izango danik lurrian,

 besteren erru ta pekatuak

 dauzkagun arte aurrian.

 Ardian kulpak bildotsak paga,

 gure mundu maltzurrian,

 Ia juzgatzen gaituzten noizbait

 geuk jarritako neurrian.