Olentzaro
E[txaniz], N.
Sukalde zabalean sutan daude egurrak;
ataditik kanpora, nagusi elurrak;
otzak ikaraz dauzka amonak ezurrak;
izara zuriz daude estaliak lurrak.
Ai, aspaldiko Gabon! Zein urruti zauden!
Gure guraso zarrak ez daude ikusten!...
Beko sua, enborrak poliki erretzen;
laratzetik zintzilik, aia irakiten.
Ta apari gozo ura olio-azakin,
bakallau-xaltxa edo bixiguarekin;
ai zuria egiņa esne ta iriņakin,
ta ardoz gorritutako konpota aiekin.
Ta nork ez gogoratu gaztaiņen soiņua,
biraka ta tiroka danbolin-barrua?
Ta apal-aurretik zuzeņ Errosariua!..
lurrean zabalduaz zeruko kantua!
Agur, guraso zarren sukalde-txokoa,
ta Gabon-eguneko apari gozoa!
Zurekin juan zan lengo sinismen sendoa,
gure aurretikoak ain gora jasoa!
Piztu beza Jainkoak berriz gure erria!
Gabon-usaiak bete dezala guzia,
ta ager bedi Belen'en Eguzki berria,
biotzen Errege dan Jesus, Aur txikia!
