Bolatoki berri bat

Etxaluze, Jose Mari

 -1-

 Bertso batzukin eman nai ditut

 jaialdi baten berriak,

 bolatoki bat egiña baitu

 aurten Zerain'go erriak.

 Lengo igandez inaugura zun

 don Jose Salaberriak,

 pestaleku bat geiago ba-du

 euskaldun joko garbiak.

 -2-

 Aize epel da eguzki printzak

 zeru aldetik eskeñi,

 biotzak pozez zabaldu bear

 egun-senti eder oni.

 Txoriak ere gu poztu nairik

 beren kantu ta armoni,

 nik pentsatzen det Jaunak askotxo

 nai ote dion Zerain'i.

 -3-

 Bolatoki au guk egin degu

 jaun batzueri eskerrak,

 batzuk lurra eman, bestek lan egin

 beste batzuek egurrak.

 Ta beste batek gu poztearren

 diru laguntza ederrak,

 urrezko letraz idatzi leizke

 Laborde ta Goñitarrak.

 -4-

 Jaun auek berak jarri zituzten

 ia saririk geienak,

 eta boletan parte artu zun

 ia Gipuzkoa denak.

 Bakoitzak berak eraman nairik

 al zan saririk onenak,

 jaunak, etziran oso asarre

 aurren gertatu ziranak.

 -5-

 Amar kopa ta txapel bikain bat,

 ba-zan saria ugari,

 Manuel Matxain Aiete'tikan

 etorria zan jokari.

 Goizean brillak astindu zitun

 gatza emanaz bolari,

 Kopa eder eta txapela

 eman genizkan berari.

 -6-

 Bolan suerte ona bear du,

 eta gañera kemena,

 aurren txandaka gelditzen dira

 ori da gauz nabarmena.

 Nik emen danak ezin aitatu,

 orrek ematen dit pena,

 Burugain jauna gendun bigarren,

 Juaristi, irugarrena.

 -7-

 Kostaldekoak ziran nagusi

 lanean banan-banaka,

 biribilla da bola, ta ori

 gertatu oi da txandaka.

 Askok zioten: «gaur ondu ezetz

 betarrak ein duten marka»,

 baña azkenik Goierritarrak

 ziran nagusi biñaka.

 -8-

 Zoriontsua zera zu Matxain,

 bai nere begitarako,

 nik geien geien maitatzen zaitut

 ain apala zeralako.

 Tokan errege, boletan maixu;

 bertso-jartzen goi mallako,

 ai, Euskalerrik baldin baleuzka

 sei milloi zu bezelako!

 -9-

 Zure mallako gizona emen

 ezta samurra izaten,

 zu izan ziñan euskal jolasak

 japondarrei erakusten;

 zu ari zera sorterriari

 kemen guziak ematen,

 euskerak eta euskal jolasak

 bizirik iraun dezaten.

 -10-

 Zeure denboran lortuko zendun

 nik eztakit zenbat sari.

 ainbat doai ta ainbat birtute

 Jaunak eman dizu zuri.

 Zuregain. Berak nolatan duen

 ainbeste grazi ixuri,

 lanikan asko ba-dadukazu

 esker ematen Berari.