Bizkaiko bertsolariak
Erkiaga, Eusebio
Ugaritu ta obatu dira
bertsolariak Bizkaian,
neurri kontua ba dakie ta
puntu zuzena amaian;
bertsoak errez asmetan dabez
bai plazan eta bai maian,
egoki jakoz gure Erriari
oraiñaldiko garaian.
Aurten txapeldun geratua da
Muxika aldeko Enbeita,
maisu jator ta ezaguna zan
edonun beronen aita;
jatorria dauka, agiri danez,
neurtitzetarako jita,
alanbearrez soiñu ta bertso
artean dago azita.
Azpillaga da azaldu jakun
itxarokizun lorea,
Artibaitiko perla oindiño
guztiz txukundu bagea;
aots zolia, izkeraz eder,
sasoi oneko gaztea,
Euskereari emongo deutsa,
bikaintasunez, ospea.
Onein ondoan ikusi doguz
txairo, beste lau errege
ziri zorrotza gerturik daukan
Larrauri-ko Ormaetxe;
urduritasun aundiz dabillen
Alberdi diñot ementxe,
Pujana-k nasai bere esanak,
Sardui-k neurria legetxe.
Antxiñakoak esaten eben
"jokoa ezta errenta",
orren ondoan danontzat ei da
"obe, oilloa erreta".
Txapelketea amaitutean,
nausi soilla bear eta
danen gustua egin nai, baiña
danok ez bardiña seta.
Bizkai osoko bertsolariei
garaiez jaken dei egin,
bear dan legez zerak egiten
iñok egin dau alegin;
baten batzuek azken orduan
nunbait artu ba dabe min,
tamalez, jaunak, lenen sariaz
guztiak etxera ezin.
Aitaturiko seiren jarraian
ba daukagu sail zabala,
bertsolariak ogetamartik
gora agertu dirala;
euron artean ba dira onak,
Mugartegi bat, itzala!
urren burrukak eztabe emongo
buruaustea makala.
Bizkaia orain, zoriortean,
emengo zeren egarri,
bertsotarako antxiñan legez
zaletasuna ugari;
odol gurea eztaigun uka,
eskubideak alkarri,
gure artean, jaungoikoak nai,
euskeraz beti alkarri.
(Lekeitio-n, 1959-ko iraillaren 8-an)