Ene maitea
Enbeita, Yon
Mendi gailurrak besarkatuaz
ba doa eguna lora
Txori alaiak urbildu dira
atseden bila basora
Nere bihotzak salto egin dit
maitasunaren txokora
Nere maitia ba dator nunbait
beheko zelaitikan gora.
Ilunabarrak besarkatu nau
aize arinak laztandu
maiteinoaren urbiltasunak
bihotza ez daian kiskaldu
Erdibiturik bizi da eta
beste erdia eskatzen du
Ta bitartean gauak eguna
osertzean du estaldu
Zeru erdian agertu dira
izarren kinu argiak
Beheko zelairantz luzatu ditut
amesez nere begiak:
Bihotza golpez lertu behar zait
jaso ditut beso biak
Gauan iluna argiz jantzi du
eldu dan nere maitiak.
«Euskaldun baratzean
jaio zinan lore
garbi eta usaintsu
larrosa dotore
Txoriak kanta dizu
amaika amore
Besarkatutzen zaitu
aize epelak ere
Zu zaitut: katiguan
lotzen nauan sare».
«Zu zaitut bihotzaren
erdiko atala
Jakin ezazu gogoz
maite zaitudala
zure taupaden otsa
nik daroadala
eta nere bizia
zugan dagoala
biok bat izateko
jaioak garala».
«Ez dugu maite behar
geu biok bakarrik
Egoismoai inoiz
ez emon indarrik
Ez dugu ahaztu behar
herriko negarrik
ezta ez-entzun egin
anaien didarrik
gugan dugun artean
maitasun su garrik».