Egunkaria irakurtzen
Enbeita, Ardatz
Egun danetan egiten dira
egunkariak publika.
Jende gehienak begirada bat
botatzen die korrika.
Bere barnean gehien bat beti
kirola ta politika.
Niretzat, berriz, politena da
azken orriko korrika.
Irakurtzean somatzen dira
hainbat ta hainbat interes;
denen gustoa egiten behintzat
ez dute izango errez.
Politika ta gerra gehiegi,
aurrentzat ia ezerrez.
Kultura saila ugaritzea
eskatzen dut nik mesedez.
Dana nahasten, ez dut ulertzen,
politika deritzona.
Batak bestea iraintzen horra
hainbat ta hainbat pertsona.
Atal honekin neurtzen ba dute
egunkari baten sona,
neure ustetan ez du merezi
ordaintzen zaien txanpona.
Triste jartzen naiz irakurtzean
eta hau da arrazoia:
batek eta bik merezi dute
neure ustean jipoia.
Erderaz ditu jantziak bere
kanpo, barru, behe ta goia,
euskara hutsez publikatzeko
jadanik bada sasoia.
Heriotza ta gerra ugari,
euskara ta poza urri;
era hontako egunkaria
ezin leike irakurri.
Euskara bada Euskalerriko
nortasunaren iturri,
Egunkaria euskalduntzeko
lendabizi hartu neurri