Leen eta orai
Adame, Piarres
Izan nauk iparrera ego aldetik,
Iguzkiko partera mendebaletik,
Eta diat ikusi guzien gainetik
Inozentzia ainitz gizonen partetik;
Abila argatik
Duk, egundainotik,
Egin gabe deusik,
Ederkiena bizi bertzen lanetik.
Munduan yarri zuan injustizia,
Nagusitu zelakotz alferkeria;
Zeinbait abilek, ez dek denbora andia,
Beretua zutela mundu au guzia;
Ik, laboraria,
Eragin azia
Eta bil biia?...
Abilarentzat zuan ogi churia!!!!
Aditu diat ere bazka onenak
Ez zituela zaldi nekatzen zenak:
Oilo, oilasko eta oilanda gizenak
laten ez zituela azten zituenak;
Ianari-finenak,
Arno gozoenak,
Gauza oberenak,
Abilek zituztela iresten denak!
Sortzetik iltzeraino, laboraria,
Uztarri-pean zuan ire tokia,
Eta, beti lanean igatuz bizia,
Irerik ez zukeyan non pausa eria;
Bertzena guzia...
Zer injustizia
Ikaragarria!
Azienden errunkan intzen yarria!
Ogoi mendez bedere ola munduan
Gizona gizonaren esklabo zuan!
Abilek ezarria urrezko tronuan
Bazuan bat errege guzien buruan;
Aren inguruan
Alferrak zituan
Bizi deskantsuan,
Eta gu lanarekin beti guduan!
Lagunak, ez duk errech orai sinesten
Ienden inozentzia nolakoa zen,
Erregeren naia, baldin, ala bazen
Miliunka zitian gizonak altchatzen;
Armak ar-arazten,
Lerroan ezartzen,
Gerlarat egortzen,
Eta an inozentek elgar chautzen!
Zinez zorigaitzezko denbora etan
Nololako miseria len bazterretan!
Pobreak biluziak non nai bidetan,
Otzak eta goseak ilak erdietan!
Zenbat ama etan
Aurrak besoetan
Gachoak errestan!...
Alferrak libertitzen yauregietan!
Etorri zuan bada nozbait orena
Gizona errestatik alchatu zena,
Eta, porroskaturik gate zakarkena,
Bere gizon dretchoak artu zituena
Au gure aitena
Duk obra leena
Eta ederrena:
Gizona esklabotik egin zutena!
Choil ez dik eun urte, lagun maiteak,
Gizonaren erronkan gure yartzeak;
Leen? Batzu nagusi... esklabo bertzeak...
Iduri aita baten ez ziren umeak!!
Geroztik, yendeak,
Andiak, chumeak,
Aberats, pobreak,
Lerro berean gaitik yarri legeak!
Ala dadin aberats, ala pobrea,
Gizona gizonaren duk aurridea,
Eta gu goratzeko bertzen apaltzea
Gure anayari duk laido egitea!
Elgar aditzea,
Elgar maitatzea
Eta laguntzea:
Ori duk egiazko Yainko-legea!