Izan niz ipharrerat hego aldetik
Elizanburu, J.B. (Piarres Adame, Salaberri)
1
Izan niz ipharrerat hego aldetik,
Iguzkiko phartera mendebaletik,
Eta diat ikhusi guzien gainetik
Inozentzia hainiz gizonen phartetik,
Abila hargatik
Duk egundainotik,
Egin gabe deusik,
Ederkiena bizi bertzen lanetik!
2
Munduan jarri zuan injustizia,
Nagusitu zelakotz alferkeria;
Zonbait abilek, ez dik denbora handia
Beretua zutela mundu han guzia;
Hik laboraria,
Erein hazia
Eta bil bihia
Abilentzat zuan ogi churia!
3
Aditu diat ere bazka onenak
Etzituela zaldi nekhatzen zenak;
Oilo, ailasko eta oilanda gizenak
Jaten etzituela hazten zituenak,
Janhari finenak,
Arno gozoenak,
Gauza hoberenak,
Abilek zituztela iresten denak!
4
Sortzetik hiltzeraino laboraria
Uztarri-pean zuan hire tokia,
Eta bethi lanean higatuz bizia,
Hirerik etzuan nun phausa erhia;
Bertzena guzia...
Zer injustizia.
Ikharrgarria!
5
Hogei mendez bederen hola munduan
Gizona gizonaren esklabo zuan!
Abilek ezarria urhezko tronuan
Bazuan bat errege guzien buruan
Haren inguruan
Alferrak zituan,
Bizi deskantsuan,
Eta gu lanarekin bethi guduan!
6
Lagunak, ez duk erretch orai sinhesten
Jenden inozentzia nolakoa den;
Erregeren nahia baldin hala baitzen
Miliunka zitian gizonak altchatzen.;
Harmak har-arazten,
Lerroan ezartzen,
Gerlarat igortzen,
Eta han inozentek elgar chahutzen!
7
Zinez zorigaitzezko denbora hetan
Holako miserïa zen bazterretan!
Pobreak buluziak nun nahi bidetan
Hotzak eta goseak hilak erdietan!
Zonbat ama hetan
Haurrak besoetan
Gachoak herrestan
Alferrak libertitzen jauregietan!
8
Ethorri zuan bada noizbait orena
Gizona herrestatik atchatu zena
Eta, phorroskaturik gathe zakharrena
Bere gizon dretchoak hartu zituena
Hau gure aitena
Duk obra lehena
Eta ederrena:
Gizona esklabotik egin zutena!
9
Choil ez dik ehun urthe lagun maiteak,
Gizonaren herrunkan gure jartzeak;
Lehen batzu nagusi, esklabo bertzeak...
Iduri aita baten etziren umeak!!!
Geroztik, jendeak,
Handiak, chumeak,
Aberats pobreak,
Lerro berean gaitu jarri legeak!
10
Ala dadin aberats, ala pobrea,
Gizona gizonaren duk haurridea,
Eta gu goratzeko bertzen aphaltzea
Gure anaiari duk laido egitea!
Elgar aditzea,
Elgar maithatzea,
Eta laguntzea,
Hori duk egiazko Jainko legea!
