Urtain

Basarri

 Gora ta gora zu sortu ziñun

 ama onaren sabela,

 Gipuzkoa-ko mendi-zelaiak

 gaur bai alaitsu daudela

 Arrazaoi aundiz ikusten det nik

 pozez gaiñezka zaudela,

 bigarren aldiz jantzi baitezu

 zuk Europa-ko txapela.

 Joxe Manuel, bein bear eta

 bete da zure ametsa,

 akatsak danok ba-ditugu-ta,

 zuk errenditu nai eza.

 Ordua da-ta, mundu guziak

 egi au aitortu beza,

 gauza benetan artutakoan

 zu austen ez da erreza.

 Arrigarrizko kemenak dira

 Jainkoak zuri emanak,

 zentzu aundirik ez du berekin

 au aitortzen ez duanak;

 naiz izan belgak, berdin frantzesak,

 ingles edo alemanak,

 gorputz guzian min artzen dute

 zuk jotzen dituzun danak.

 Gazte denboran marka guziak

 ondu ziñun arrietan,

 neurri gabeko gatza baitago

 zure beso-gerrietan.

 Kontrarioak asko dituzu

 euskaldun lurrean bertan,

 indarra zer dan ez dakitenak

 ari dira berriketan.

 Baserri kaxkar batetik jetxi,

 eta kalean luzitu,

 opiziorik ikasi gabe

 onen danak errenditu;

 bigarren aldiz Europa ontan

 jaun da nagusi gelditu,

 zeiñek ote du, Joxe Manuel

 zuk dezun ainbat meritu?

 Derrigor utzi bearko dezu

 laister Europa atzera,

 zu beartuko zaituzte, noski,

 itxasoa pasatzera.

 Ameriketan norbait joango da

 aguro lurra jotzera,

 azken aldian bezin gogotsu

 saiatzen baldin bazera.

 Seguru nago indarrez iñork

 ez dizula eragingo,

 gaiñontzean zer gerta diteken

 aurrez ez degu jakingo.

 Ameriketan on asko dira,

 nola lengo ta oraingo,

 baiña zurekin nat dutenikan

 ez dute aixa egingo.

 Erremeritzen saia zaitea

 oraiñarteko utsuna,

 berdingabeko aukera baita

 orain etorri zaizuna;

 danok dakigu Jainkoak gaia

 sobrean eman dizuna,

 Joxe Manuel, zeure eskuetan

 daukazu etorkizuna.