Nere bordatxotik
Basarri
Otsailla amaitu da
Saratsak lanik asko ba-dute
beren buruak edertzen,
arnas-berri bat asia dago
kanpo guzia indartzen.
Neguak ilda utzitakoak
or ari dira loretzen,
Udaberria gañean da-ta;
guziok poztu gaitezen!
Ostro-berritu zugaitz maiteok,
artu jantzi apañena,
adar puntetan txoriak kantuz;
oiek duten zoramena!
Bizi berri bat esku-zabalka
zuregandik datorrena,
O, Udaberri, zu zera beti
urte-sasoi ederrena.
***
Viet-Nam aldeko goraberak
Zertarako da zelai-baratzak
guziz apaintzea lorez,
gizonak alkar iltzen badabiltz
asmo txar eta dollorrez?
Gorrotoaren uztarripean
noiz arte seta gogorrez?
Gizatasuna bear da emen;
naikoa degu odolez!
Alde batera, nolatan egon
Udaberrian pozetan,
gizon gerala aitortutzeak
uzten bagaitu lotsetan?
Ezin piatu iñola ere
entzuten diran itzetan,
«Pakea» dago mingañetan da
«gerra» berriz biotzetan.
Ainbat gorrotu, ainbat inbiri,
nundikan dator gugana?
Danok agindu naia daukagu;
onek ematen du lana.
Mundu osoa ikusten det nik
palsikerira emana,
bat esan eta bestea egin,
ori da gertatzen dana.