Nere bordatxotik
Basarri
Patxi Eskudero'ri
«Zigor» operak ez dik
gaur izen makala,
ondo erakutsi dek
balio dezala.
Danak aitortzen ditek
goi-goikoa dala,
pentsatzen nian ala
gertatuko zala.
Len egiña «Illeta»
ta orain opera,
azitzen ari aiz i
kolpetik kolpera.
Iri eskerrak, Patxi,
emendik aurrera,
euskal musikak ba-dik
munduan sarrera.
Ola goraltzen dek ik
erri maitatua,
beraren alde ago
ainbat lan artua.
Goiko gallurrean dek
ire talentua,
«Eman da zabaldu zak
munduan frutua».
***
Au jendea!
Esku zikiñekoak
ba-dabiltz ementxe,
lotsik gabe jarriak
daude ortaraxe.
Lapurtuz bizikleta,
motor eta kotxe,
litxarreroak indar
daukate oraintxe.
Lan orri ekiteko
ba-dute azala,
ezer palta zaionak
billatu dezala.
Ikusten da beldurrik
gabe dabiltzala,
ezpaitira zigortzen
merezi bezela.
Arrapatuta ere
arpegiz txit alai,
amabost egun pasa
ditezke nolanai.
Estalpea seguru,
zer jana ere bai,
oietako askotxok
eztu besterik nai.
|