Nere bordatxotik
Basarri
Urtain ta Gallastegi
Urtaiņ'i eta Gallastegiri
au kantatu nai diozu,
Plaza gizonak ikusten lendik
ondo oituak gaude gu.
Atzoko zuen burruka ori
aiņ itsatsia daukagu,
Arnasik degun artean beti
gogoan izango degu.
Urtain gaztea, ondo dauzkatzu
itz goxo bi mereziak,
Eztigu kalte aundirik egin
zu lanean ikusiak.
Neurririk eta mugarik eztu
daukazun indar biziak,
Aztuerazi dituzu bapo
oraiņarteko guziak.
***
Bergara pelotaria
Oso indartsu eta sasoiko
jun ziņan zu Tolosa'ra,
Baita lenengo iritxi ere
ogeitabi tantotara.
Amaikatxori sartu diozu
oraingo ontan ikara,
Bigarren mallan txapeldun zera:
Bejondaizula Bergara!
***
Ostolaza ta Zulaika
Gozamenetan utzi dezute
atzo Tolosa'ko plaza,
Jostallutxo bat balitz bezela
arriabai errez altza!
Gorputz aundirik eztezunarren
nunbait ba-dezu zuk gatza,
Danak batera aitortu zuten:
ona zera Ostolaza!
***
ZUlaika'ri eskeņia
Lan egiteko asmoak zeunden
aspaldi xamar artuta,
Zuri begira egonak gera
zearo ikaratuta.
Zuk emandako jasoaldiak
garbi daude kontatuta,
Jokoa galdu zenduen baņa
oso gizon jokatuta.
***
Automobilla lapurtu
Sarri sarritan au galdetzen det:
ortara nola iritxi?
Besteren gauzez jabetzeko gaur
zenbaiti ajola gutxi.
Kilometrotan erabilita
kale bazterrean utzi,
Maria Luisa, artu bearra
dago emen pazientzi.
***
Urrezko eztaiak
Oraintxe berrogeitamar urte
izan zan zuen ezkontza,
Zenbat pozaldi, zenbat naigabe,
biok ordutik onuntza.
Biarko meza santu orretan
biotzak jaso goruntza,
Eskerrak eman eta aurrerako
eska zazute laguntza.
