Nere bordatxotik
Basarri
Euskalerriko Bertsolari Txapelketa Nagusia
Jaunak zoria eman baizigun
egun ori ikusteko,
Ordua degu guk esker ona
biotzez erakusteko.
Bertsolariak kanta ta kanta
euskal biotzak pozteko,
Pesta oberik etzeiken jarri
Urte Berria asteko.
***
Zorionean ez gendun entzun
legezko etzan izkerik,
Asierako etzgon, noski,
obean billa asterik.
Ezta komeni edozein moduz
ur garbi danak nasterik,
Puntu gaiztoak eztu egiten
jaia ondatu besterik.
***
Aurreko zarrak ere laurekin
ziran kantatzen oituak
Noizik eta bein bostetaraņo
luzatuz beren kantuak.
Alper alperrik izaten dira
ortik gorako puntuak,
Oietan ere probatu leizke
gizonaren talentuak.
***
Ori eztala gai egokia
egon zaitezte etsita,
Bertsolarien iturri danak
uzten baititu itxita.
Eskarmenturik asko badegu
gerta zana ikusita,
Beste zerbaitxo asma bear da
txiste kontuak utzita.