Nere bordatxotik
Basarri
Sega apustuak (Tximela'k)
Ona emen muestratxo bat:
Andazarrate'n, zenbat
kotxez eta motoz?
Milla ta lareunen bat
entzunik gatoz.
Egualdi bikaņa zan
ez bero ta ez otz,
orretxegatik bete
ziņan Iturriotz;
zenbat giņan zorrotz
esaten enaiz lots
bertako ta arrotz
geldituko naiz motz...
Amalau bat milla bai
txapel da motots.
***
Makina ta aizkolariak
Zerrak aguro menderatzen du
basoko egur tentela,
Ta ikusten da basomutillak
aizkora utzi dutela.
Gizonak ezin danik agertu
makina batek bezela,
aurrerapenik gendukakenik
ezin esan guk bestela.
***
Latasa sunbillatarra
Azaletatik Latasa zan da
Gartziarena barrendik,
Jendeak etzun begirik kendu
Sunbilatarrarengandik.
Erdi illean len egon bazan,
etzun ezagun iņondik,
jendea kontuz ibill leike,
gogorra dago oraindik
Nekatzen danik ere Latasa'k
eztirudi alajaņa,
lenago ere makiņabati
artu izan dio gaņa,
Gorputzez aundi ezpada ere
bai aizkolari bikaņa,
Gizonak estu artuko ditu
motordun zerrak ez baņa.
Gipuzkoarra eztago berriz
orri obeditu naian,
irabaztunak derrior dauka
gelditu bearra goian.
"Polipaso" au orain banago
berebiziko sasoian,
Komeri latzak izango dira
abenduaren ogeian.
***
"Dunixi" zanaren oroimenez
Idazle gozo, txukun, landua,
ta pintatzalle ernea,
Jaunak deiturik, bukatu zaigu
mundu ontako unea.
Gorputz, anima, zu bai ziņala
egizko euskal semea,
betetzen ezta oso erreza
utzi dezun utsunea.
Zenbat alegin egin zenitun
lur maitearen gorantzan,
Ai, "Dunixi" bat gure artean
oso bearrekoa zan.
Zuk egindako ona ez leike
iru-lau bertsotan esan,
Zuri eskerrak dakigu danak
lengo Donostia zer zan.
Liburu zoragarri bateri
zenion arnas emana,
bertan bildu ta mamitu zendun
Donosti'ren kutsu dana.
"Dunixi" maite, zeu joanagatik
goiko Nagusiangana,
ordaņez emen gelditzen zaigu
zuk egin zenduen lana.
Zugaitzetako osto igarrak
lurrera udazkenean,
gu ere orbel biurtzen gera
gutxien uste danean.
Bereganatu zindun Jainkoak
ordua bete zanean,
Maixu maitea, zaude goxoki
betiko atsedenean.