Nere bordatxotik
Basarri
Makineriz betea Ordizi'ko feri plaza
Aspaldi ontan estu ta larri
ikusten da baserria,
Zerbait aldatu bearrean da;
ba-dago, jaunak, premia!
Nekazaritza biurtzezkero
eroso ta egokia,
Makineriak artu bear du
ganaduaren tokia.
Ez ote dago nekazaritza
beste modutan jartzerik?
Ez ote dauka baserritarrak
bizi-mallaz ibitzerik?
Aitona zarren bide beretik
eztaukagu ibiltzerik,
Aurrera begiratzen eztunak
eztauka gaur bizitzerik.
***
Martiri artzobispoa
Beren odola oparo eman
zuten Japon'go lurretan,
Aien auzia, ikusten danez,
eztabill esku txarretan.
Urte askorik pasa baņo len,
ara zer pentsatzen detan,
Bi gipuzkoar santu ikusi
ditezkela aldaretan.
***
Gaitzaren zabaltzalle
Ankamin orrek etxe askotan
sortua digu nastea,
Bein da betiko menderatuta
nai genduke ikustea.
Ateak ixten asi ezkero
obe da danak ixtea,
Itxurazkoa eztet billatzen
batzuk zabalik uztea.
***
Bi segalari
Iturriotz'en egun orretan
azer nolako mundua,
Baserritarrak egingo dute
bertaratzeko modua.
Urtebetean izan dezute
nun ezia ta zaildua,
Dituzutenak erakusteko
laister dezute ordua.
***
Etienn Salaberry
Jaun Salaberry'k dion bezela
begira beti aurrera,
Danen gaņetik gordeaz beti
nor beraren izakera.
Beste modutan izango degu
mesede ainbat galera,
Aurrerapenak alperrik dira
geu atzeratzen bagera.
***
Udazkena dator
Ezkutatuko zaizkigu bizkor
gaur ditugun itxastarrak,
Orru galantak egingo ditu
tarteka kantauri zarrak.
Beroan ordez laister ditugu
euri, elur, kazkabarrak,
Era ontantxe dijoaz gure
lurreko urte bakarrak.