Nere bordatxotik
Basarri
Beljikako Balduino erregea
"Ongi Etorri" esan nai luke
bertsolariak kantari,
Eskertzen degu gureganako
dezuten maitasun ori.
Ezagutuko dezute nunai
txoko polita ugari,
Alare eziñ utzi iñola
Gipuzkoa'ko lurrari
Mendi magalez, itxas gañean
etxe bat atsedentoki,
Pakezale dan bikote bat or
bizi diteke egoki.
Gure artera datorrenari
ateak pozik ideki,
Jende prestua nola tratatu
Euskalerriak ba-daki.
***
Orio'ko arraunlariak Españi'ko txapeldun
Zuen izena entzuten gaude
eztakit zenbat urtetan,
Oriotarrak grazi aparta
dute beti arraunketan.
Begiratuta kontrariorik
etzan ikusten urretan,
Etzendukaten kezka aundirik
Asturias'ko uretan.
Estuasunik gabe nagusi
gelditu zerate legez,
Indarrez sendo zaudete nunbait,
alatsu abilidadez.
Txanpa bizkorra jotzen duenak
aixa egiten du iges,
Artu zorion biozkorrenak
"Zeruko Argia'n" bidez.
***
Prezioak gora
Kutizi danak ondo betetzen
anai maiteok, gaur lan da,
Kontu aundiak etortzen dira
utsa jan eta edanda.
Eta jendea diru botaka
oso nekez ikusten da,
Gastatu errez egiñagatik
kostata irabazten da.
Prezio danak gora dijoaz
sekulako itxumenez,
Euneko eun ez irabaziaz
iñortxo kontentatzen ez.
Frantzi'ko eran asiko gera
laister, pentsatzen dedanez,
Bear diranak etxean artu
eta kanpora irten ez.
***
Gure buruak parregarri
Geure burua itxustea da
sarri egiten deguna,
Ondo peintsatzen jarri ezkero
au buru arintasuna!
Ain arlote ta parregarria
ote da ba euskalduna?
Ikusi gabe ezin sinistu
guri gertatzen zaiguna.
Lotsaren lotsez ezin agertu
aurrez ikusten degunik,
iñoiz ixilka negar malkoak
ixuri izan ditut nik.
Etxea galtzen ari dan batek
eztu izaten zentzunik,
Enuen uste oinbesteraño
umetu bear gendunik.